Bjarni Eyjólfur Guðleifsson fæddist 21. júní 1942 í Reykjavík. Hann lést á Sjúkrahúsinu á Akureyri 7. september 2019. Bjarni var afkastamikill fræðimaður, rithöfundur, fjallgöngumaður og ótal margt fleira. Eftir Bjarna liggur fjöldinn allur af vísindagreinum, bókarköflum og fræðilegum greinum auk almennra greina og pistla sem birst hafa í ýmsum tímaritum. Hann ritstýrði bæði bókum og tímaritum og má þar t.d. nefna Heimaslóð, árbók hreppanna í Möðruvallaklaustursprestakalli. Greint er frá andláti Bjarna í Morgunblaðinu.
Bjarni kvæntist eftirlifandi eiginkonu sinni Pálínu Sigríði Jóhannesdóttur hinn 27. desember 1972 og eignuðust þau fjögur börn.
Bjarni ólst upp í Vesturbæ Reykjavíkur, gekk í Melaskóla og síðar Menntaskólann í Reykjavík. Hann fluttist um tvítugt til Noregs þar sem hann var við nám í níu ár. Þaðan lauk hann kandídats- og doktorsprófi frá jarðræktardeild Landbúnaðarháskólans á Ási og fluttist að námi loknu norður í land til starfa við Tilraunastöð RALA á Akureyri en sú starfsemi fluttist síðar að Möðruvöllum í Hörgárdal. Hann starfaði lengst af sem náttúrufræðingur við Rannsóknastofnun landbúnaðarins og síðar sem prófessor við Landbúnaðarháskóla Íslands.
Allan sinn starfsferil var hann búsettur á Möðruvöllum í Hörgárdal og vann að rannsóknum á sviði landbúnaðar.
Rannsóknarsvið hans sneri að sjúkdómum og þoli plantna en einnig fékkst hann við rannsóknir á smádýrum. Eftir Bjarna liggur fjöldinn allur af vísindagreinum, bókarköflum og fræðilegum greinum auk almennra greina og pistla sem birst hafa í ýmsum tímaritum. Hann ritstýrði bæði bókum og tímaritum og má þar t.d. nefna Heimaslóð, árbók hreppanna í Möðruvallaklaustursprestakalli.
Bjarni var mikill fjallgöngu- og útivistarmaður og skilur eftir sig ófá spor á hálendi Íslands, einkum á Tröllaskaga. Hann ritaði bækur um náttúruskoðun og gaf auk þess út, bæði í formi bóka og korta, göngulýsingar um fjalllendi á Íslandi. Hann var virkur félagi í starfi KFUM&K; og Gideonmanna alla sína tíð.
Hann stofnaði og stýrði Ferðafélaginu Hörgi til margra ára og kom að uppbyggingu Fólkvangsins á Hrauni í Öxnadal. Auk þessa gegndi hann margvíslegum trúnaðarstörfum í ýmsum félagasamtökum og stjórnum, og var hvatamaður fjölda viðburða í heimasveit sinni, Hörgársveit.
Útför Bjarna Eyjólfs fer fram í dag, 16. september 2019, á Degi íslenskrar náttúru, frá Möðruvallaklausturskirkju í Hörgárdal og hefst athöfnin klukkan 13.30.