Almenn bólusetning hjá börnum gegn pneumókokkum á Íslandi hefur reynst árangursrík og hagkvæm síðan hún hófst hér á landi árið 2011. Hagkvæmnisútreikningar kostnaðar fyrir fyrstu fimm árin eftir innleiðingu bóluefnisins sýndi sparnað fyrir íslenskt samfélag upp á tæplega einn milljarð króna á verðlagi ársins 2015.
Frá þessu er greint á vef embættis landlæknis.
Þar segir að pneumókokkabakteríur geti valdið margvíslegum sýkingum eins og miðeyrnabólgu, kinnholubólgu, lungnabólgu og alvarlegum ífarandi sýkingum eins og blóðsýkingum og heilahimnubólgu.
Vísað er til nýlegrar doktorsritgerðar Elíasar Sæbjörns Eyþórssonar, sem hann varði þann 5. júní síðastliðinn. Í henni var sýnt fram á að bólusetningin hafði minnkað sýklalyfjanotkun hjá börnum um tæplega 6 prósent, fækkað innlögnum barna á sjúkrahús vegna lungnabólgu um 20 prósent og fækkað miðeyrnabólgum og alvarlegum ífarandi sýkingum hjá börnum marktækt.
„Þessar niðurstöður sýna glöggt að bólusetningar eru ekki einungis áhrifaríkar til að koma í veg fyrir alvarlegar sýkingar heldur einnig eru þær afskaplega kostnaðarhagkvæmar,“ segir í frétt embættis landlæknis.
Dánartíðni um 10 prósent
Í umfjöllun Mbl.is um málið segir að sjúkdómar af völdum pneumókokka hafi verið viðvarandi heilsufarsvandamál á Íslandi og að svo virðist sem tíðni alvarlegra sýkinga af völdum þessara baktería sé hærri hérlendis en í mörgum nálægum löndum. Dánartíðni af völdum þessara sjúkdóma er um 10 prósent hér á landi.
Ífarandi pneumókokkasýkingar hafa verið nokkuð stöðugar síðastliðin 10 ár. Á Íslandi greinast að jafnaði um 50 einstaklingar á ári með alvarlega sýkingu, en í fyrra var tilkynnt um 31 smit af völdum pneumókokka. Að jafnaði eru um 10 börn undir 5 ára aldri sem sýkjast á hverju ári en algengast er að fullorðnir einstaklingar sem komnir eru yfir sextugt sýkist. Ífarandi sýkingar eru sjaldgæfar meðal barna og fullorðinna í öðrum aldurshópum.