STÖÐVUM MJÓLKURKLÁMIÐ, SEGIR LUKKA

Mjólk er vissulega GÓÐ – en EKKI endilega fyrir tennur og bein:

STÖÐVUM MJÓLKURKLÁMIÐ, SEGIR LUKKA

Sagt er að á þriggja sekúndna fresti brotni bein af völdum beinþynningar á heimsvísu.  Beinþynning er algengt vandamál á Íslandi og af hennar völdum brotna bein fjögurra Íslendinga á degi hverjum.

Þetta kom fram í Heilsuráðum Lukku Pálsdóttur á Hringbraut í gærkvöld, sem sjá má hér á vef stöðvarinnar, en þátturinn fjallar um mjólkurklámið, eins og hún orðar það, en umsjárkonan bendir á að undir nýlegri fyrirsögn í fjölmiðli hér á landi sem fjallaði um kalkskort hafi verið mynd af hillu fullri af skyri; af fréttinni hafi sumsé mátt draga þá ályktun að aukin neysla á mjólkurvörum væri lausnin á beinþynningarvanda þjóðarinnar.   

"Mjólkurklám! sagði eiginmaður minn sem hefur séð fjöldann allan af rannsóknum sem benda til þess að neysla á kúamjólkurafurðum tengist AUKINNI tíðni beinþynningar og beinbrota en ekki öfugt," segir Lukka í þættinum: "Helstu kenningar um skaðleg áhrif mjólkurneyslu á bein eru annars vegar að mjólkurprótein og sykur (á sérstaklega við um sykurbættar mjólkurvörur) valdi úrkölkun og hins vegar hafi mikil kalkneysla þau áhrif að beinmyndandi frumur (osteoblasts) verði fyrir auknu álagi og skipti sér hraðar og því þrjóti þær fyrr á ævinni hjá þeim sem neyta mikilla mjólkurvara. Mjólkurneysla getur því styrkt bein til skamms tíma en verið orsakavaldur beinþynningar seinna á ævinni vegna hraðari öldrunar beinmyndandi fruma. Þetta er svipað því sem gerist hjá húðmyndandi frumum í mikilli sól – þær eldast hraðar," bendir Lukka á í heilsuþætti kvöldsins. 

Og hún er með sitt á hreinu: "Fjöldi rannsókna bendir einnig til þess að mikil neysla kúamjólkurafurða tengist aukinni hættu á krabbameinum og öðrum langvinnum sjúkdómum. Rannsóknir hafa bent til tengsla á milli mjólkurneyslu og krabbameina í æxlunarfærum s.s. brjósta-, legháls- og blöðruhálskrabbameina.  Ein af ástæðunum er talin aukning IGF-1 (Insulin-like growth factor) við mjólkurneyslu en IGF-1 hefur hvetjandi áhrif á frumuskiptingar. Sumar rannsóknir, þar með talin Íslensk rannsókn finna tengsl mjólkurneyslu við aukna áhættu krabbameina síðar á ævinni en aðrar rannsóknir sýna að neysla kúamjólkurvara getur örvað vöxt krabbameina þegar hann er á annað borð hafinn.  Sem sagt valdi ekki krabbameininu en örvi vöxt þess."

Hún segir að þó svo einnig sé hægt að finna jákvæðar rannsóknir um góð áhrif mjólkurneyslu séu heilsubætandi áhrif kúamjólkurneyslu í öllu falli mjög umdeild og því sé hreinlega rangt eða ósiðlegt að ýta undir þá trú fólks að kúamjólk sé nauðsynleg tann- og beinheilsu Íslendinga. En hvernig styrkjum við tennur og bein, spyr Lukka og það stendur ekki á svari: "D-vítamín og K-vítamín eru ekki síður mikilvæg en kalk til að styrkja tennur og bein. Æfingar með lóðum og tog vöðvafestinganna á beinin styrkja þau hvað best.  Styrktarþjálfun, brokkólí, fræ, baunir og sólarljós væru því betri beinstyrking en öll mjólk í heiminum." 

Lukka kveðst þó ekki vera öfgamanneskja í þessum efnum: "Sjálf drekk ég mjólk.  Mér finnst hún alveg nauðsynleg í kaffibollann minn á morgnana og ostur er reglulega borðaður á mínu heimili ásamt AB-mjólk og kotasælu.  Ég vel þessar afurðir vegna nautnarinnar við að borða þær en ekki til að styrkja tennur og bein. Það er mikilvægt að kalla hlutina réttum nöfnum.  Mjólk er vissulega GÓÐ – en EKKI endilega fyrir tennur og bein," segir Lukka í Heilsuráðum sínum.

Nýjast