Meirihluti skuldabréfaeigenda WOW air hefur komist að samkomulagi um fjárhagslega endurskipulagningu fyrirtækisins. Samkomulagið felst í að breyta skuldum skuldabréfaeigendanna í hlutafé með það fyrir augum að fjármagna flugfélagið þar til það nær stöðugleika til langframa. Þetta kemur fram í fréttatilkynningu frá WOW air og Mbl.is greinir frá.
„Þetta er mikilvægt skref í fjárhagslegri endurskipulagningu félagsins og stöðugleika WOW Air til langframa,“ segir í tilkynningunni.
WOW greindi frá þessum áformum sínum á sunnudag. Áformin kváðu á um að umbreyta skuldum í 49 prósent hlutafjár og að bjóða 51 prósent hlut í félaginu til sölu. Flugfélagið bindur vonir við að fá 40 milljónir dollara, eða fimm miljarða króna, fyrir 51 prósent hlutinn.
Þar sem þessi áform hafa nú verið samþykkt af nægilega mörgum skuldabréfaeigendum eru formlegar viðræður við mögulega fjárfesta nú þegar hafnar.