Vigdís Hauksdóttir, borgarfulltrúi Miðflokksins, og Kolbrún Baldursdóttir, borgarfulltrúi Flokks fólksins, vilja vísa skýrslu innra eftirlits Reykjavíkurborgar um braggamálið til héraðssaksóknara. Þær hyggjast leggja fram tillögu þess efnis á borgarstjórnarfundi á þriðjudaginn. Fréttablaðið greinir frá.
Á fundi borgarráðs í gær óskuðu Vigdís og Kolbrún eftir umræðu um skýrsluna og lagði Vigdís þar fram bókun þar sem hún greindi frá því að þær hyggjast flytja tillögu á borgarstjórnarfundi á þriðjudaginn um að vísa skýrslunni til héraðssaksóknara, til frekari yfirferðar og rannsóknar. Rökstyður hún þessa ákvörðun sína og Kolbrúnar með vísan í almenn hegningarlög um skyldur opinberra starfsmanna í störfum sínum.
Vigdís segir í bókuninni að í skýrslunni sé að finna „mjög alvarlegar athugasemdir og ábendingar“, meðal annars um „alvarleg lögbrot sem of langt mál er að fara yfir í bókun þessari.“ Hún segir borgarfulltrúa vera að bregðast ríku eftirlitshlutverki sínu sem kjörinna fulltrúa ef þeir aðhafist ekkert í kjölfar þess að innri endurskoðandi hafi eftirlátið borgarfulltrúum úrvinnslu skýrslunnar.
