Fyrsta skóflustungan að nýrri gas- og jarðgerðarstöð SORPU var tekin á föstudag dag í Álfsnesi. Verkefnið markar tímamót og er bygging gas- og jarðgerðarstöðvar í Álfsnesi stærsta verkefni SORPU frá því fyrirtækið hóf starfsemi árið 1991, segir í frétt á vef Sorpu undir yfirskriftinni Fyrsta skóflustungan að grænni framtíð.
Þar segir að með tilkomu stöðvarinnar verður gjörbylting í meðhöndlun heimilisúrgangs á höfuðborgarsvæðinu og urðun lífræns úrgangs verði liðin tíð.
Á vef Sorpu kemur einnig fram að endurnýting heimilisúrgangs verði yfir 95 prósent með tilkomu stöðvarinnar.
Áætlað er að stöðin verði komin í fullan rekstur fyrri hluta árs 2020 og mun hún anna allt að 35.000 tonnum af lífrænum heimilisúrgangi. Markmiðið með gas- og jarðgerðarstöðinni er að nýta sem best allan lífrænan úrgang sem til fellur á heimilum á höfuðborgarsvæðinu, s.s. matarleifar, gæludýraúrgang o.fl. Ekki aðeins nýtast næringarefnin sem felast í lífrænum heimilisúrgangi, heldur einnig orkan sem verður til við niðurbrot úrgangsins. Ársframleiðsla stöðvarinnar verður annars vegar um 3 milljónir Nm3 af metangasi, sem hægt er að nýta sem eldsneyti á ökutæki, og hins vegar 10-12.000 tonn af jarðvegsbæti, sem hentar vel til landgræðslu.
Í tilkynningunni er nefnt að Gas- og jarðgerðarstöðin sé mikilvægt skref í að draga úr útblæstri gróðurhúsalofttegunda vegna meðhöndlunar úrgangs. Nýting metans í stað jarðefnaeldsneytis á ökutæki hefur í för með sér verulegan ávinning fyrir umhverfið. Metan sem nú er unnið á urðunarstað SORPU er eina umhverfisvottaða eldsneytið á Íslandi, en það ber norræna umhverfismerkið Svaninn.
Ætlað er að metanframleiðsla SORPU muni tvöfaldast með tilkomu gas- og jarðgerðarstöðvar og getur metanið þá komið í staðinn fyrir um fimm milljónir bensínlítra árlega. Þá verða þúsundir tonna af jarðvegsbæti úr lífrænum heimilisúrgangi öflugur liðsauki í landgræðslu og skógrækt og þar með bindingu kolefnis í gróðri.
Breytt vinnsla heimilisúrgangs mun hafa margvísleg jákvæð áhrif á bæði umhverfi og samfélag. Fyrsta skóflustungan að gas- og jarðgerðarstöð er stórt skref í átt að grænni og sjálfbærari framtíð.
