Þrír eru látnir og fimm særðust í skotárás í sporvagni í borginni Utrecht í Hollandi í gærmorgun. Árásarmaðurinn, 37 ára gamli Tyrki að nafni Gökmen Tanis, var handtekinn síðdegis í gær eftir að hafa lagt á flótta að árásinni lokinni. Mbl.is greinir frá.
Í morgun yfirheyrði hollenska lögreglan Tanis auk tveggja annarra manna vegna árásarinnar. Lögreglan hefur ekki gefið upp hver tengsl mannanna tveggja við árásina séu.
Í gær sagði borgarstjóri Utrecht að málið sé rannsakað sem hryðjuverk. Lögreglan vill þó ekki útiloka að ástæða árásarinnar hafi verið önnur, til að mynda fjölskylduerjur. Recep Tayyip Erdogan, forseti Tyrklands, segir leyniþjónustu Tyrklands vera að skoða árásina og hefur hann gefið í skyn að ástæða hennar væri fjölskylduerjur.
BBC hefur eftir tyrkneskum kaupsýslumanni að Tanis hafi á árum áður tekið þátt í átökum í Tsjetsjeníu, en hópar vígamanna með tengsl við vígasamtökin Ríki íslams hafa lengi starfað á svæðinu. „Hann var handtekinn vegna tengsla sinna við Ríki íslams, en var svo síðar látinn laus,“ sagði kaupsýslumaðurinn við BBC.
