„Dómsmálaráðuneytð hefur úrskurðað að sýslumaður höfuðborgarsvæðisins skipi þriggja manna nefnd til að taka afstöðu til kæruefnis míns um gildi borgarstjórnarkosninganna í Reykjavík. Jafnframt felldi ráðuneytið úr gildi ákvörðun sýslumanns að vísa kæru minni frá.“
Þetta ritar Vigdís Hauksdóttir, borgarfulltrúi Miðflokksins, á Facebook-síðu sína seint í gærkvöldi. Eins og áður hefur verið greint frá telur hún borgarstjórnarkosningarnar ólöglegar og hefur gripið til allra mögulegra leiða til að kæra þær.
Í apríl, þegar Vigdís tilkynnti að hún hefði kært úrskurð sýslumannsins á höfuðborgarsvæðinu um að taka ekki kæru hennar vegna kosninganna til efnismeðferðar eða úrskurðar sagði hún:
„Fallni meirihlutinn á ekki að komast upp með kosningasvindl í afliðnum borgarstjórnarkosningum. Ég hef nú kært úrskurð sýslumannsins á höfuðborgarsvæðinu og tæmi þar með kæruleiðir innanlands. Nú fer kosningakæran í nýtt ferli.“
Nú mun þriggja manna nefnd taka afstöðu til kæru Vigdísar og hefur hún því að heita má unnið áfangasigur í málinu.
Færsla Vigdísar ásamt skjáskoti af úrskurðinum: