„Getur verið að einn alvarlegasti hýsill e.coli orkupakkasýkingar í landinu sé höfundur Reykjavíkurbréfsins og einn skæðasti smitberinn sé Morgunblaðið en mér er sagt að blaðið fari inn á um það bil 12.000 heimili í landinu en fer um hendur mun fleiri.“
Þorkell Sigurlaugsson fv. framkvæmdastjóri hjá Háskólanum í Reykjavík og formaður velferðarnefndar Sjálfstæðisflokksins gagnrýnir Davíð Oddsson ritstjóra Morgunblaðsins harðlega á Facebook en Viljinn vekur athygli á pistli Þorkels. Ástæðuna fyrir skrifum Þorkels er gagnrýni Davíðs á forystu Sjálfstæðisflokksins vegna þriðja orkupakkans. Þá fær Guðlaugur Þór væna sneið af gagnrýni frá Davíð. Þorkell segir:
„Svo kemur að Reykjavíkurbréfinu og þar á maður oft ekki von á góðu. Ekkert óvænt þar til að byrja með, en lesturinn fyllti mann meiri depurð og hneykslan en nokkru sinni fyrr. Aldrei sérstök gleði, hamingju og bjartsýni í því bréfi og er að þessu sinni skrifað til að niðurlægja Guðlaugur Þór Þórðarson.“
Þá efast Þorkell um andlega heilsu Davíðs. Hann segir:
„ ... en skrifin geta varla komið frá manni sem er í eðlilegu andlegu jafnvægi. Höfundur Reykjavíkurbréfsins hefur áhyggjur af dalandi laganámi í landinu, en hann ætti frekar að leita sér aðstoðar við skrif sem eru orðin ávanabindandi fíkn og farin að skaða höfundinn eins og svæsnasti e-coli vírus úr ís frá Efstadal II.
Það sem er verra, hann er farinn að skaða fjölda Íslendinga, því eins og forseti Filippseyja, sérstakur aðdáandi höfundar Reykjavíkurbréfsins sagði; „.. þá borða Íslendingar bara ís!“
Ég þvoði mér um hendurnar eftir að lesa Morgunblaðið að þessu sinni. Þetta Reykjavíkurbréf er mikil hrákasmíð. Ég sé mikið eftir þeim trjágróðri sem felldur hefur verið til að prenta það í 12.000 eintökum svo ég vitna til sambærilegrar gagnrýni Davíðs Oddssonar á endurreisnarskýrslu Flokksins sem Vilhjálmur Egilsson, veitti forstöðu árið 2009.“
