Meginniðurstöður nýrrar skýrslu Hagfræðistofnunar Háskóla Íslands um þjóðhagsleg áhrif hvalveiða eru að þær séu hagkvæmar. Kristján Þór Júlíusson, sjávarútvegs- og landbúnaðarráðherra, hafði síðastliðið vor óskað eftir því við stofnunina að hún myndi meta þessi áhrif. Þetta kemur fram í fréttatilkynningu frá Atvinnuvega- og nýsköpunarráðneytinu.
Í skýrslunni segir: „Þegar allt er skoðað virðast hvalveiðar vera hluti af hagkvæmri nýtingu náttúruauðlinda landsmanna. Rök hníga til þess að hagkvæmt sé fyrir þjóðarhag að haldið verði áfram að veiða hvali.“
Niðurstöður skýrslunnar voru kynntar fyrir ráðherra og hagsmunaaðilum í gær. Hagfræðistofnun Háskóla Íslands hefur áður unnið skýrslu um þjóðhagsleg áhrif hvalveiða. Sú fyrri kom út árið 2010 og kallast niðurstöður í öllum meginatriðum á við niðurstöður hinnar nýútgefnu skýrslu.
Í tilkynningunni kemur fram að Hagfræðistofnun hafi litið til fjölmargra þátta, s.s. afkomu og umsvifa af hvalveiðum og hvalaskoðun, áhrif hvalveiða á aðra nytjastofna og efnahagsleg áhrif, m.a. á ferðaþjónustu og útflutningsgreinar.
