Aðalstjórn Vals hefur ákveðið að reka Svein Aron Sveinsson, leikmann meistaraflokk Vals í handknattleik úr liðinu. Ákvað Valur að rifta samningnum vegna dóms sem Sveinn Aron hlaut vegna alvarlegrar líkamsárásar.
Á vef Morgunblaðsins kemur fram að Sveinn Aron hafi verið dæmdur í níu mánaða fangelsi, þar af sjö skilorðsbundna. Átti árásin sér stað á bílastæði við Sæmundargötu í Reykjavík í september fyrir tveimur árum.
Sveinn viðurkenndi að hafa ráðist á manninn sem féll til jarðar. Sparkaði Sveinn þá ítrekað í höfuð þolandans. Sveinn var dæmdur til að greiða þolandanum 700 krónur í miskabætur en sá sem fyrir árásinni varð hlaut dreifða heilaáverka auk annarra verkja og blæðinga.
Valur hefur sent frá sér tilkynningu vegna málsins en hún hljóðar svo:
Aðalstjórn Knattspyrnufélagsins Vals hefur fjallað um mál Sveins Arons Sveinssonar leikmanns meistaraflokks Vals í handknattleik, í kjölfar dóms sem hann fékk.
Sú ofbeldishegðun sem leikmaðurinn játaði að hafa sýnt er í algjörri andstöðu við allt sem Valur stendur fyrir og hafa því allar forsendur fyrir samstarfi félagsins og leikmannsins brostið.
Félaginu er því nauðugur einn sá kostur að rifta samningnum. Með birtingu fréttar um málið í fjölmiðlum fengu stjórnarmenn Vals fyrst vitneskju um þann verknað sem leiddi til hans.