Það er ekkert minna en kæfandi hiti sem mætir landsliðsstrákunum okkar í fótbolta á bökkum árinnar Volgu í dag og flugnagerið allt í grennd berst yfir eins og skýjaþykkni á köflum.
Leikurinn hefst klukkan 18 að staðartíma, klukkan 15 að íslenskum, en þá verður hitastigið 31 gráða og heiðskírt. Það verða því aðrar aðstæður en þegar Ísland mætti Argentínu í Moskvu fyrir tæpri viku.
Að því er segir á mbl.is ætla stuðningsmenn íslenska landsliðsins að hittast á stuðningsmannasvæði, Fan Zone, rétt eftir hádegi og hita vel upp fyrir leikinn en reiknað er með að 2-3.000 Íslendingar verði á Volgograd Arena í kvöld.
