Frávísunarúrskurður í máli fjögurra meðlima hljómsveitarinnar Sigur Rósar var kveðinn upp í Héraðsdómi í morgun en fjórmenningarnir voru grunaðir um stórfelld skattalagabrot.
Þeim Jón Þór Birgisson, Orri Páll Dýrason, Georg Holm og Kjartan Sveinsson var gefið að sök að hafa komist hjá að greiða rúmlega 150 milljónir króna og var rannsókn málsins mjög umfangsmikil. Eignir fyrir um 800 milljónir króna voru kyrrsettar meðan á henni stóð en tónlistarmennirnir greindu frá því að málið mætti rekja meðal annars til mistaka endurskoðanda.
Fréttablaðið greindi frá því að héraðssaksóknari hafi strax ákveðið að áfrýja málinu til Hæstaréttar og er áfrýjunarfresturinn fjórar vikur. Lögmaður hljómsveitarinnar, Bjarnfreður Ólafsson segir að dómurinn hafi tekið undir með frávísunarkröfu sinni sem byggð var á því að um væri að ræða tvöfalda málsmeðferð sem ekki samræmist mannréttindasjónarmiðum.
„Það er bara útaf þessum kerfisvanda sem að er hér á landi. Það er tvöföld refsing í svona stærri skattalagamálum. Það er lögð á refsing hjá ríkisskattstjóra og síðan fer málið í aðra meðferð sem er sjálfstæð rannsókn hjá saksóknara og dómstólamál og farið fram á viðbótarrefsingu í máli sem þegar er búið að refsa fyrir,“ segir Bjarnfreður og bætir því við að íslensk stjórnvöld ætli seint að horfast í augu við þennan kerfisvanda.