„Af hverju að fara svona með aðrar manneskjur; Ali var kominn með atvinnuleyfi sem hann fagnaði mjög, vildi standa á eigin fótum og svo strax í kjölfarið er honum vísað úr landi. Það er ekki boðlegt að fara svona með fólk.“
Þetta segir Sólveig Anna Jónsdóttir formaður Eflingar. Þar deilir hún frásögn af Facebook-síðunni ekki fleiri brottvísanir. Þar er greint frá því að þrír flóttamenn hafi verið handteknir og tveir fluttir úr landi í morgun. Sólveig opnar sig einnig um það þegar hún vann á leikskóla þar sem börn voru hrifsuð í burtu og sáust ekki meir. Mennirnir sem var vísað burt í morgun heita Ali, Mohsen og Milad. Ali var kominn með atvinnuleyfi og starf og Milad sá fram á atvinnuleyfi líka. Nú bíða þeirra ofsóknir í heimalandinu. Sólveig segir:
„Þegar ég vann í leikskólanum byrjuðu það börn, 2 systkini, strákur og stelpa. Við tókum á móti þeim, „aðlöguðu“\" og sinntum eftir bestu getu, eins og öðrum börnum. Svo mættu þau ekki í nokkra daga; fötin þeirra voru í hólfinu, stígvélin í skóhillunni og svo var farið að athuga hvort allt væri í lagi og hvenær þau kæmu aftur í leikskólann.
Aldrei, var svarið.
Ástæðan var að þau voru börn hælisleitenda. Þau fengu ekki að sækja fötin sín eða myndirnar. Sólveig segir:
„Þau hurfu bara eina nóttina, sáust aldrei meira.“
Þá bætir Sólveig við:
„Ég hef oft hugsað um alla manneskju-orkuna sem þau og foreldrar þeirra og líka við, starfsfólkið, settum í þetta litla en mikilvæga verkefni sem leikskóladvölin var; allar þessar manneskjur að vanda sig, að hugsa, að reyna að skilja og læra, vera kurteis, sýna umhyggju, nota alla sammannlegu getuna okkar til að ná góðri niðurstöðu svo að börnin gætu haft það sem best.“
„Og þetta algjöra virðingarleysi fyrir því verkefni sem valdið sýndi svo, þegar það lét eins og ekkert væri sjálfsagðara en að senda þau svo burt, ekki eins og lifandi mennsk börn, heldur bara eins og hvert annað drasl,“ segir Sólveig og bætir við að lokum:
„Mikið er það ömurlegt að koma svona fram við annað fólk, mikið er það aumkunarvert, mikið hljótum við öll að skammast okkar þegar það opinberast að sumt fólk, sum börn eru svo óæskileg á Íslandi að það er hægt að leika sér að löngunum þeirra og tilfinningum, hægt að vekja von, búa til pláss til þess eins að eyðileggja það svo við fyrsta tækifæri.“