Guðrún Hafsteinsdóttir, formaður Samtaka iðnaðarins, var meðal ræðumanna á ráðstefnu sem haldin var í Brussel í tilefni þess að 25 ár eru liðin frá stofnun EES-samningsins. Guðrún sagði þar meðal annars að með samningnum hafi Ísland fengið aðgang að innri markaði Evrópu með frjálsu flæði fólks, vöru, þjónustu og fjármagns. Ísland væri lítið og landfræðilega einangrað og lífsgæði landsmanna byggju því á frjálsum viðskiptum við önnur lönd.
Frá þessu er greint á vef SI.
Á ráðstefnunni sagði Guðrún það nánast ómögulegt að meta til fjár þann ávinning sem Ísland hefur haft af EES og nefndi sem dæmi að einungis ábati tollfríðinda á útflutningsvörur okkar séu að minnsta kosti 30 milljarðar króna á ári. Hún sagði EES auk þess vera mikilvægasta markað íslenskra útflutningsfyrirtækja, þar sem samningurinn hafi fært landsmenn úr gjaldeyrishöftum sem höfðu þá varað í rúm 60 ár.
Þá sagði Guðrún að Ísland hafi aðgang að margfalt stærri vinnumarkaði með frjálsu flæði fólks innan EES og að mikill meirihluti þess 37.000 erlenda launafólks sem starfar á Íslandi í dag komi frá EES. Án þeirra væru lífsgæði okkar allra lakari og mannlíf okkar fábreyttara. Þá hafi fjöldi Íslendinga fengið tækifæri til að læra og starfa í EES ríkjum og afla sér þannig mikilvægrar þekkingar og reynslu sem skili sér í mörgum tilfellum aftur heim.
Hún sagði að vaxandi verndarhyggja sem gætti í heiminum væri áhyggjuefni. Hvað það varðar sagði Guðrún að EES mætti kalla brjóstvörn okkar, bæði hér innanlands og erlendis. EES, og allt sem því fylgir, sé orðið svo samofið íslensku samfélagi að almenningur verður oft ekki var við allan ávinninginn sem af því hljótist. Ávinningurinn væri samt ótvíræður og það sé ljóst að lífskjör á Íslandi væru lakari fyrir alla landsmenn ef við værum ekki hluti af svæðinu. Hún sagði EES vera mun mikilvægara fyrir Íslendinga en fyrir Evrópusambandið. Það sé því grundvallaratriði fyrir Ísland að standa vörð um samstarfið og að uppfylla skyldur sínar gagnvart því í hvívetna.
Guðrún sagði að lokum að EES-samningurinn ætti sér óvildarmenn sem hafi undanfarið reynt að grafa undan honum, meðal annars með miklu málþófi um ýmsa þætti hans. Hún sagði mikilvægt að hafa í huga þegar EES-samningurinn sé skoðaður að hann sé nokkuð langt frá því að vera til jafns við ESB-aðild. EES sé sérsniðinn samningur sem hafi hentað íslenskum hagsmunum ákaflega vel.
