Ríkisstjórnin samþykkti á fundi sínum í morgun að senda til Alþingis þingsályktunartillögu utanríkisráðherra um innleiðingu þriðja orkupakkans. Með þingsályktunartillögunni heimilar Alþingi að aflétta stjórnskipulegum fyrirvara við ákvörðun sameiginlegu EES-nefndarinnar um upptöku þriðja orkupakkans í EES-samninginn.
Frá þessu er greint í sameiginlegri fréttatilkynningu frá utanríkisráðuneytinu og atvinnuvega- og nýsköpunarráðuneytinu.
Þar segir að þær reglur sem eigi við um flutning raforku yfir landamæri séu innleiddar með þeim lagalega fyrirvara að þær komi ekki til framkvæmda nema að Alþingi heimili lagningu raforkustrengs. Þá þurfi jafnframt að taka á nýjan leik afstöðu til þess hvort reglurnar standist stjórnarskrá. Allir fræðimenn sem að málinu hafa komið eru sammála um að sú leið sem lögð er til við innleiðingu sé í fullu samræmi við stjórnarskrá.
Einnig kemur fram að sameiginlegur skilningur íslenskra stjórnvalda og framkvæmdastjórnar ESB á gildi þriðja orkupakkans sé að stór hluti ákvæða hans gilda ekki eða hafi neina raunhæfa þýðingu fyrir Ísland á meðan enginn raforkusæstrengur er til staðar á innri raforkumarkaði ESB. Ennfremur er áréttað að ákvörðunarvald um raforkustrengi milli Íslands og innri raforkumarkaðar ESB liggi alfarið hjá íslenskum stjórnvöldum.
Þá er greint frá því að um sé að ræða orkupakka á íslenskum forsendum. Hann sé tekinn upp í íslenskan rétt á þeirri forsendu að Ísland sé ekki tengt við raforkumarkað ESB.
Þriðji orkupakkinn
Þriðji orkupakkinn er safn ESB-gerða sem varða innri markað fyrir raforku og gas innan ESB. Hann er framhald á markaðsvæðingu framleiðslu og sölu á raforku, sem var innleidd hér á landi með fyrsta og öðrum orkupakkanum í gegnum raforkulög árin 2003 og 2008.
Þriðji orkupakkinn felur í sér, eins og hinir tveir fyrri, ákvæði um rétt neytenda og neytendavernd, aðgang að flutnings- og dreifikerfum rafmagns, gagnsæi á markaði, aðskilnað samkeppnisrekstrar (framleiðslu og sölu) frá sérleyfisrekstri (flutningi og dreifingu) og fleira í þá veru.