„Ég ætla að vera vongóð þangað til að annað kemur í ljós. Þessi ríkisstjórn hefur sagt að það þurfi að breyta skattkerfinu til þess að létta sköttum af þeim lægst launuðu. Þannig að það er skref í áttina,“ segir Drífa Snædal, forseti Alþýðusambands Íslands. Kjarninn greinir frá.
ASÍ lagði á dögunum fram umfangsmiklar skattatillögur sem innlegg í kjaraviðræður. Í þeim felst að sett verði á fjögur skattþrep, lagður verði á hátekjuskattur, auðlegðarskattur verði tekinn upp að nýju og skattayfirlit aukið verulega til að fjármagna tillögurnar.
Drífa er gestur Þórðar Snæs Júlíussonar, ritstjóra Kjarnans, í frétta- og umræðuþættinum 21 á Hringbraut í kvöld, þar sem hún ræðir þessar tillögur.
Drífa segist ánægð með að ASÍ sé búið að útfæra sínar skattatillögur en að hún hafi ekki séð hverjar skattatillögur stjórnvalda séu. „En ég reikna með að það sé hugmyndafræðilegur ágreiningur innan stjórnvalda, innan ríkisstjórnarinnar.“ Þar vísar hún til þess að Vinstri græn og Sjálfstæðisflokkurinn, sem sitja saman í ríkistjórn, eru á öndverðum meiði þegar kemur að afstöðu til þrepaskipts skattkerfis.
Vinstri græn, sem leiða sitjandi ríkisstjórn, hafa verið með þrepaskipt skattkerfi á stefnuskrá sinni fyrir síðustu kosningar. Í stefnu flokksins segir m.a. að eðlilegt sé að innleiða lágan auðlegðarskatt og þrepaskiptan fjármagnstekjuskatt. Auk þess sé eðlilegt að „hafa þrepaskiptan tekjuskatt og að ofurtekjur séu skattlagðar meira en lægri tekjur og venjulegar launatekjur. Tryggja þarf aukið jafnræði með því að loka leiðum til að fela tekjur og einkaneyslu í einkahlutafélögum.“
Í aðdraganda kosninga árið 2016 skrifaði Katrín Jakobsdóttir, forsætisráðherra og formaður Vinstri grænna á Twitter aðgangi sínum: „Aukið gagnsæi og þrepaskipt skattkerfi er lykill að auknum jöfnuði. Leyndin gerir fólki kleift að velja sér eigin skattprósentu!“
Bjarni Benediktsson, fjármála- og efnahagsmálaráðherra, hefur aftur á móti gagnrýnt tillögur ASÍ um þrepaskipt skattkerfi og sagt að þær muni leiða til þess að skattbyrði hækki á meðaltekjufólk og jaðarskattar aukist. Sjálfstæðisflokkurinn hefur þá yfirlýstu stefnu í skattamálum að lækka skatta og einfalda skattkerfið.
Drífa segir að Bjarni sé að lesa rangt út úr tillögum ASÍ. „Við erum ekki að leggja til að millitekjuhópurinn greiði skattalækkanir fyrir lágtekjuhópinn, heldur viljum við vernda millitekjuhópinn líka. Það náttúrulega kostar peninga að breyta skattkerfinu, þá erum við að fara að hreyfa við tugmilljörðum. En við hins vegar bendum líka á það að ríkisstjórnin hefur afsalað sér mikilvægum tekjustofnum síðustu ár, auðlegðarskattinum með því að afnema milliþrep á skattinum. Það eru matarholur sem hægt er að finna.“
Drífa nefnir einnig auðlindagjöld, ekki einungis á sjávarútveg heldur líka á ferðaþjónustu. „Við erum ekki endilega að tala út frá þeirri stöðu sem er í dag varðandi tekjuöflun, heldur eru leiðir til frekari tekjuöflunar.“
Nánar er rætt við Drífu í 21 í kvöld. Þátturinn hefst klukkan 21:00.