„Það mátti gera ráð fyrir því fyrir fram að í þeim hópi myndi Samkeppniseftirlitið kannski líta út fyrir, eða koma illa út í samanburði einfaldlega vegna þess að Samkeppniseftirlitið er frábrugðið öðrum stofnunum sem spurt var um, vegna þess að við erum brotaeftirlit. Þar sem er vesen, þar erum við,“ segir Páll Gunnar Pálsson, forstjóri Samkeppniseftirlitsins,
Hann vísar þar til nýbirtrar könnunar sem ráðgjafanefnd um opinberar eftirlitsreglur lét Maskínu gera til að kanna eftirlitsmenninguna á Íslandi. Í niðurstöðum könnunarinnar kemur fram að samkvæmt mati á 16 mismunandi eftirlitsstofnunum kom Samkeppniseftirlitið hvað verst út. Kjarninn greinir frá.
Páll Gunnar er gestur Þórðar Snæs Júlíussonar, ritstjóra Kjarnans, í frétta- og umræðuþættinum 21 á Hringbraut í kvöld, þar sem hann ræðir m.a. þessa könnun. Þátturinn hefst klukkan 21:00.
Hann segir að það sé jákvætt að kannanir sem þessar séu gerðar. „Við erum alltaf að hlusta eftir því hvernig hægt sé að gera hlutina betur. Í þessi tilviki þá er einhver hópur fyrirtækja á einhverjum lista hjá Samtökum atvinnulífsins spurður. Það eru allnokkrar eftirlitsstofnanir þarna undir.“
Páll Gunnar segir að gera mætti ráð fyrir því að Samkeppniseftirlitið kæmi illa út vegna eðli starfsemi þess, sem snýst um brotaeftirlit. „Við erum að grípa inn í þegar okkur sýnist að einhver brot eða samkeppnishindranir séu í gangi. Það leiðir af eðli máls að fyrirtæki sem lendir í rannsókn hjá Samkeppniseftirlitinu er ekkert sérstaklega ánægt með það.“
Hann segir að það hafi valdið sér vonbrigðum hversu takmörkuð könnunin sé. „Það kemur í ljós að 21 fyrirtæki af þessum hópi segist hafa verið í samskiptum við samkeppniseftirlitið á síðustu tólf mánuðum. Það er afar litill hópur. Okkur sýnist að á árinu 2018 höfum við verið í formlegum samskiptum við upp undir 450-500 fyrirtæki.“
Þorri þeirra samskipta séu góð. „Þannig að það er erfitt að sjá hvað sé hægt að lesa út úr þessu, allavega í augnablikinu.“
Hér má sjá brot úr viðtalinu: