„Það er eiginlega talið öruggt að Pútín hljóti endurkjör. Spurningin er með hve miklum meirihluta og hver kosningaþátttakan verður.“ Þetta segir stjórnmálafræðingurinn og fyrrverandi sendiherra Íslands í Rússlandi, Albert Jónsson á fréttavefnum mbl.is, en á morgun fara fram forsetakosningar í Rússlandi.
Í síðustu forsetakosningum, sem fram fóru 2012, hlaut Pútín tæplega 64% atkvæða, en kosningaþátttakan var um 65%. Einn helsti andstæðingur Pútíns, Alexei Navalny, hefur hvatt landa sína til þess að sniðganga kosningarnar. Honum var meinað að bjóða sig fram í kosningunum vegna fimm ára skilorðsbundins fangelsisdóms sem hann hlaut vegna fjármálamisferlis.
„Ég er viss um það að Pútín og stjórnvöldum er annt um það að þátttaka verði sem mest og þeir eru viðkvæmir fyrir þessu. Það á eftir að koma í ljós að hve miklu leyti þetta tekst. Navalny er vinsæll, en hann er það fyrst og fremst í Moskvu og að hluta til í Pétursborg,“ segir Albert við vefinn, en hann telur ekki að Navalny muni hafa afgerandi áhrif á kosningaþátttöku.