Metan er einn orkugjafanna sem mætti huga meira að en það hefur verið framleitt hjá sorpu síðan uppúr síðustu aldamótum. Í þættinum Súrefni sem fjallar um umhverfismál er skoðað hvers konar valkostur metanið er, t.d. í samanburði við rafmagnið. Vegna skuldbindinga í loftslagsmálum þarf að huga betur og hraðar að orkuskiptum í samgöngum.
Linda Blöndal skoðar uppbygginguna í Álfsnesi hjá Sorpu og ræðir þar við framkvæmdastjórann Björn H. Halldórsson en þar er verið að byggja nýja gas-og jarðgerðarstöð sem verður tilbúin í febrúar á næsta ári.
Metanframleiðsla úr sorpi mun aukast mikið
Gert er ráð fyrir að framboð á metani muni aukast um nærri 100 prósent með tilkomu stöðvarinnar og má nýta það metan á ökutæki, t.d. í almenningssamgöngum, en einnig má nota metanið í annað. Ársframleiðsla stöðvarinnar verður um 3 milljónir Nm3 (Normalrúmmetrar) sem nota má á ökutæki en metan er selt eftir Normalrúmmetra einingum.
Sorpið aldrei meira
Sorpa þróar aðferðir við vinna verðmæti úr úrgangsefnum. Fyrirtækið framleiðir og selur eldsneyti og orku úr úrgangi sem fellur í sífellt meiri mæli frá heimilum og atvinnulífinu og hefur gert síðan uppúr aldamótum. Magn úrgangs sem SORPA tekur við hefur aukist um tæplega 63 prósent frá árunum 2014 til 2018. Í fyrra var tekið á móti alls 263.000 tonnum af úrgangi. Efnahagur landsmanna endurspeglast að vissu leyti í úrgangsmagninu.
Íslenska metanið er í allra hæsta gæðaflokki með allt að 98 prósent hreinleika því fylgir ekkert sót ná annað sem mengar og losun CO2 er engin.
Talsmaður ungra umhverfissinna er einnig viðmælandi þáttarins sem hefst í kvöld Kl.20.