„Þetta frumvarp er skref í þá átt að gera konur í þessu landi frjálsari og ég styð það heilshugar og hefði sjálf stutt það að hafa engan tímamörk.“
Þetta sagði Katrín Jakobsdóttir forsætisráðherra við atkvæðagreiðslu um frumvarp um þungunarrof í gærkvöldi. Frumvarp Svandísar Svavarsdóttur heilbrigðisráðherra hefur verið afar umdeilt en það var samþykkt á Alþingi með 40 atkvæðum gegn 18. Þegar frumvarpið var samþykkt brutust út mikil fagnaðarlæti í þingsal.
Margrét Friðriksdóttir frumkvöðlafræðingur og einn stjórnandi Facebook hópsins Stjórnmálaspjallsins sem telur um tíu þúsund meðlimi er afar ósátt við niðurstöðuna. Margrét sem hefur verið viðloðandi Sjálfstæðisflokkinn, Frelsisflokkinn og Flokk fólksins segir að Guð muni refsa þeim sem samþykktu frumvarpið. Margrét segir á Stjórnmálaspjallinu sem telur eins og áður segir um tíu þúsund manns:
„Þetta eru böðlar samfélagsins gleymum aldrei þessum nöfnum sem að samþykktu dráp á ungbörnum í móðurkviði þegar kona er gengin 5 og ½ mánuð án nokkurrar ástæðu og takið eftir langflest heilbrigð. En kvenfrelsið vegur meira að mati þessa siðblinda fólks sem fagnar drápum á hvítvoðungum í móðurkvið, hreinn og klár viðbjóður.“
Margrét er afar trúuð og segir að Guð muni refsa þessu fólki: „En þau fá öll sína refsingu svo mikið er víst, því Guð segir þú skalt ekki mann deyða og er þetta ekkert annað en dráp á manneskjum sem nú er búið að lögfesta á hinu lága alþingi Íslendinga.“
Katrín sagði í gær að hún mæti það svo að hugmyndafræðin á bakvið frumvarpið væri að útvíkka frelsi og réttindi fólks.
„Ég treysti konum til að fara vel með þetta frelsi og umgangast það af ábyrgð en við skulum hafa það í huga að konan verður ekki frjáls nema að hún ráði yfir eigin líkama.“
Margrét finnst ekki mikið til þessa orða koma og kveðst hafa misst allt álit á Katrínu og segir hugarfar hennar ógeðslegt. Margrét segir:
„Við höfum tilfinningalausa manneskju sem forsætisráðherra sem finnst í lagi að myrða heilbrigð börn í móðurkvið og kannski fram að fæðingu eða stuttu eftir eða að 5 ára aldri ef móður snýst hugur.“
