Margrét Björnsdóttir fæddist í Reykjavík 31. janúar 1956. Hún lést á líknardeild Landspítalans þann 1. júlí 2019. Eiginmaður Margrétar er Jón Hrafnkelsson krabbameinslæknir og eignuðust þau þrjú börn. Margrét starfaði í heilbrigðisráðuneytinu frá árinu 1999 og var þá fyrst deildarstjóri, sérfræðingur og síðan skrifstofustjóri og gegndi því embætti til dánardags. Margrét var einnig efnilegur dansari en ung að árum var hún orðin dansari í Íslenska dansflokknum.
Í október 2017 fór Margrét í röntgenmyndatöku vegna höfuðverkja og ógleði. Þar greindist hún með fyrirferð í höfðinu. Síðar eftir aðgerð og greiningu kom í ljós að það var illkynja æxli af verstu tegund. Við tók löng og ströng meðferð en allt kom fyrir ekki. Æxlið varð aftur sýnilegt við rannsókn haustið 2018. Margrét barðist með aðdáunarverðri seiglu til aðfaranætur 1. júlí síðastliðins.
Greint er frá andláti Margrétar í Morgunblaðinu.
Margrét ólst upp í Vogahverfinu, gekk í Vogaskóla og Menntaskólann í Reykjavík en útskrifaðist árið 1980 úr Háskóla Íslands með B.Sc.-gráðu í hjúkrunarfræði. Árið 1982 fluttu Margrét og Jón til Svíþjóðar þar sem Margrét lagði stund á þverfaglegt framhaldsnám í heilbrigðisstjórnum og rannsóknum við félagsvísindadeild Háskólans í Linköping. Árið 1984 fluttust þau aftur til Íslands.
Margrét starfaði sem sviðsstjóri hjúkrunar og hjúkrunarframkvæmdastjóri á Sjúkrahúsi Reykjavíkur/Borgarspítala frá 1987-1999. Þá hóf Margrét störf í heilbrigðis- og tryggingamálaráðuneyti, síðar velferðarráðuneyti og nú heilbrigðisráðuneyti árið 1999, fyrst sem deildarstjóri, sérfræðingur og síðar skrifstofustjóri.
Í lok árs 2009 var Margrét sett í embætti forstjóra Lýðheilsustöðvar 2010-2011 og stýrði hún sameiningarferli Lýðheilsustöðvar og Landlæknisembættisins í samstarfi við landlækni.
Eftir þá sameiningu sneri hún aftur til fyrri starfa í ráðuneytinu og var skipuð skrifstofustjóri gæða- og forvarna árið 2015. Því embætti gegndi hún til dánardags.
Systkini Margrétar segja í Morgunblaðinu:
„Hún Magga systir barðist við sjúkdóminn af aðdáunarverðri seiglu til aðfaranætur 1. júlí síðastliðins. Þótt hún hafi verið án meðvitundar síðustu sólarhringana, þá yfirgaf hún ekki þennan heim fyrr en hún vissi að frumburður frænku hennar væri að fæðast. Þótt sorgin væri yfirþyrmandi við andlát Möggu vildi þannig til að það liðu eingöngu 12 tímar frá andláti þar til frískur og heilbrigður drengur fæddist í fjölskylduna. Þannig viljum við minnast Margrétar systur okkar, með trega í brjósti en gleði í hjarta.“
Í minningargrein í Morgunblaðinu segir um Margréti:
„Hún var skarpgreind og gaman að ræða við hana um allt á milli himins og jarðar. Hún var einstaklega falleg, hallmælti engum og virtist alltaf geta séð það jákvæða í fari fólks. Hún var vinnusöm með afbrigðum og oft heyrði maður henni hrósað af vinnufélögum, enda var vinnan henni mikils virði. Það fór ekki á milli mála hve mjög hún elskaði börnin sín, tengdabörn og barnabörn og var stolt af þeim myndarlega og duglega hópi. Velferð þeirra var ávallt í fyrirrúmi. Hennar verður sárt saknað en minningarnar um ljúfa, fallega konu lifa í hjörtum okkar.“