Bæði Íslandsbanki og Landsbankinn spá því að Seðlabanki Íslands muni áfram lækka stýrivexti á næstunni. Frá þessu er greint í Markaðnum. Sem kunnugt er lækkaði Seðlabankinn stýrivexti bankans um 0,5 prósent í síðasta mánuði. Meginvextir bankans, vextir á sjö daga bundnum innlánum, eru nú 4 prósent.
Í stýrivaxtaspá Íslandsbanka er því spáð að peningastefnunefnd muni lækka vexti um 0,25 prósent við næstu vaxtaákvörðun, sem verður greint frá þann 26. júní næstkomandi. Auk þess er því spáð að stýrivextir muni halda áfram að lækka, líklega um 0,5 prósent á síðari hluta ársins.
Í nýrri þjóðhagsspá hagfræðideildar Landsbankans kemur fram að greiningaraðilar bankans telji að stýrivaxtalækkun síðasta mánaðar hafi verið fyrsta skrefið í stýrivaxtalækkunarferli bankans. Er því spáð að peningastefnunefnd Seðlabankans muni lækka vexti um alls 1 prósent í skrefum á næstunni.
„Við teljum að það sem helst muni hafa áhrif á ákvörðunina nú sé annars vegar veiking krónunnar, sem dregur heldur úr líkum á vaxtalækkun, og hins vegar lækkun verðbólguvæntinga fyrirtækja, sem styður við að næsta skref í lækkun vaxta verði tekið,“ segir í spánni.
