Íslenskur maður sem var svikinn um 1,4 milljónir króna á Tenerife árið 2015 sakar Arion banka og Valitor um alvarlega vanrækslu. Fyrirtækin vildu ekkert fyrir hann gera þrátt fyrir að upp kæmist að um skipulagða glæpastarfsemi væri að ræða sem hefði svikið 1,5 milljónir evra af um þúsund ferðamönnum.
Þetta kemur fram í Morgublaðinu í dag, en þar er hann ómyrkur í máli í garð téðra fyrirtækja: \"Í Arion banka á ég reikning sem ég stofnaði fyrir fjörutíu árum í Búnaðarbankanum. Ég er búinn að eiga við þá farsæl viðskipti og hef alltaf staðið við mitt. Svo kemur upp eitt tilfelli og mér er stillt upp eins og einhverjum fjárglæframanni,“ segir Þorvaldur Ingi Jónsson, en mál hans gegn Arion banka var tekið fyrir í Hæstarétti á miðvikudag. Í apríl á síðasta ári dæmdi Héraðsdómur Reykjavíkur Arion banka til þess að fella niður kreditkortafærslur Þorvaldar og þáverandi konu hans sem lent höfðu í svikum við kaup á spjaldtölvu á Tenerife árið 2015. Greiðslurnar sem um ræðir nema um 1,4 milljónum íslenskra króna.
Málið var tekið fyrir í Hæstarétti á miðvikudag, en Arion banki áfrýjaði dómi Héraðsdóms Reykjavíkur þess efnis að bankanum bæri að fella niður færslur af korti mannsins: \"Þetta eru sár mál og það er mjög erfitt að þeir skuli ganga fram með þessum hætti, gefa ekki tommu eftir og hafa ekki sýnt neina burði til að verja viðskiptaumhverfi sitt,“ segir Þorvaldur Ingi Jónsson, þolandi í máli þessu, við Morgunblaðið, en vefur þess, mbl.is hefur fjallað ítarlega um niðurstöðu dómsins sem hægt er að lesa nánar um hér.
