Frá og með 3. júní næstkomandi mun Íslandspóstur innheimta svokallað sendingargjald, sem verður á bilinu 400 til 600 krónur, af sendingum sem koma erlendis frá og bera aðflutningsgjöld. Alþingi samþykkti nýverið viðauka við póstlög sem heimilar slíka ráðstöfun. Mun þessi kostnaður bætast við 500 króna umsýslugjald og virðisaukaskatt sem Íslandspóstur rukkar þegar fyrir.
Frá þessu er greint í fréttatilkynningu frá Póstinum. Hið nýja sendingargjald verður 400 krónur fyrir sendingar frá Evrópu en 600 krónur fyrir sendingar frá löndum utan Evrópu.
Í tilkynningunni segir að sendingargjaldinu sé ætlað að standa undir kostnaði við dreifingu erlendra sendinga sem hingað berast frá erlendum póstfyrirtækjum. Eftir breytinguna munu sendingar frá útlöndum sem innihalda vörur bera aðflutningsgjöld sem greidd eru til ríkisins, ásamt umsýslugjaldi og hinu nýja sendingargjaldi sem Íslandspóstur innheimtir.
Helga Sigríður Böðvarsdóttir, framkvæmdastjóri fjármálasviðs hjá Íslandspósti, segist búast við óánægju vegna ákvörðunarinnar:
„Við gerum okkur grein fyrir því að þessi ráðstöfun á eftir að valda einhverri óánægju og skiljum það vel. Ljóst er að innheimta sérstaks sendingargjalds er óheppileg leið til þess að mæta því að ekki hefur enn tekist að ná fram þeirri breytingu á alþjóðasamningum að burðargjald erlendra sendinga standi undir dreifingarkostnaði. Staðan er hins vegar sú að núgildandi fyrirkomulag getur ekki gengið lengur að óbreyttu og þetta er talin heppilegasta gegnsæja leiðin til þess að fá nægilega greitt fyrir erlendar sendingar.“
Hún vonast til þess að hagstæðari samningar séu handan við hornið. „Undanfarin ár hefur Íslandspóstur tapað verulegum fjárhæðum á núgildandi fyrirkomulagi og ljóst er að fyrirtækið getur með engu móti staðið undir þessum kostnaði. Við bindum vonir við að hagstæðari samningar geti verið handan við hornið enda standa póstfyrirtæki víðsvegar um heim í sömu sporum og við hér á Íslandi, en unnið er að því að ná fram breytingum á gildandi alþjóðasamningum. Takist það má vænta þess að þá þurfi ekki að nýta heimild til innheimtu sérstaks sendingargjalds.“
Í tilkynningunni eru ástæðurnar fyrir upptöku sendingargjaldsins raktar nánar: „Ástæða þess að nauðsynlegt er að grípa til þessara ráðstafana er sú að verð samkvæmt alþjóðlegum samningum um póstsendingar hefur verið allt of lágt til að standa straum af kostnaði við dreifingu á Íslandi og hefur Íslandspóstur þurft að fjármagna þann mismun. Á síðasta ári nam tapið af þessum hluta starfsemi fyrirtækisins alls um 920 milljónum kr. og hefur verið áframhaldandi tap á þessu ári. Íslandspóstur hefur ekki svigrúm til þess að standa undir þessum kostnaði og því hafa stjórnvöld staðið fyrir breytingu á lögum um póstþjónustu, sem heimila innheimtu sendingargjalds til þess að fjármagna mismuninn.“