Aðeins um þriðjungur nauðgunarmála fara fyrir dóm en á árunum 2002-2015 voru 65 prósent nauðgunarmála á Íslandi felld niður af hálfu saksóknara. Þögul mótmæli gegn niðurfellingum nauðgunarmála fóru fram í dag. Tvær konur segja frá sinni reynslu af niðurfellingu og hvaða áhrif það hefur haft á þær.
Þetta er brot úr viðtali Fréttablaðsins. Hér má lesa viðtalið í heild sinni.
Ingibjörg Sigurðardóttir kærði tvo menn fyrir kynferðislegt ofbeldi og í báðum tilfellum var málið fellt niður. Ingibjörg segir að annað málið hafði verið fellt niður vegna þess að það var „orð gegn orði“ en í hinu málinu var sagt að hún væri að nota kæruna til að tálma umgengni.
Fyrri kæra hennar var felld niður í fyrra en það hafði verið í kringum ár á þvæling í kerfinu. Gerandinn í því máli er barnsfaðir hennar en hún lýsir því að hann hefði misnotað bæði sig og eldri börn hennar. „Manni var bara grýtt í gólfið eða rúmið eða hvað það var, þar til hann fékk sínu fram,“ segir Ingibjörg en á þeim tíma bjó hún með manninum.
Að sögn Ingibjargar fór það mál einnig til Barnahúss þar sem það kom skýrt fram að börnin höfðu orðið fyrir þessu. Hún segir manninn hafa ráðið góðan lögfræðing sem hafi síðan fengið málið fellt niður. Sá úrskurður hafi verið mjög sorglegur þar sem börn áttu einnig hlut í málinu.
Þetta er brot úr viðtali Fréttablaðsins. Hér má lesa viðtalið í heild sinni.