Sigurður Ingi Jóhannsson, samgöngu- og sveitarstjórnarráðherra, veltir því fyrir sér hvort arðgreiðslur Landsvirkjunar séu skynsamlegri leið til að fjármagna vegakerfið næstu 4-5 árin í stað veggjalda. Þetta sagði hann í viðtali í útvarpsþættinum Sprengisandi á Bylgjunni í gær. Kjarninn greinir frá.
Arðgreiðslurnar hafa verið hugsaðar fyrir svokallaðan Þjóðarsjóð en Sigurður Ingi segir um þetta: „Við vitum að arðgreiðslur eru að koma frá Landsvirkjun, ekki síst á næstu árum. Við höfum verið að ræða það að setja það í Þjóðarsjóð. Er kannski skynsamlegra að nota það í einhver ár við uppbyggingu vegakerfisins? Er það meiri ávinningur fólginn í því og gera svo eitthvað í þessari gjaldtöku í 4-5 ár?“
Sigurður Ingi segir enga ákvörðun ennþá hafa verið tekna um upptöku veggjalda. Samgönguáætlun til næstu 15 ára var afgreidd úr umhverfis- og samgöngunefnd í lok janúar. Sigurður Ingi mun fylgja málinu eftir með frumvarpi á vorþingi. Eftir það þurfi Alþingi að endurútfæra samgönguáætlunina á haustþingi.
