Frumrannsókn yfirvalda á Sri Lanka sýnir fram á að hryðjuverkaárásirnar á páskadag, sem hafa kostað 310 mannslíf hið minnsta og sært yfir 500 manns, voru hefndarverk vegna hryðjuverkaárásanna í Christchurch á Nýja Sjálandi í síðasta mánuði. Þetta er haft eftir Ruwan Wijewardene, varnarmálaráðherra Sri Lanka. Mbl.is greinir frá.
„Frumrannsóknin hefur afhjúpað að það sem gerðist á Sri Lanka var í hefndarskyni fyrir árásina gegn múslimum í Christchurch,“ sagði Wijewardene við þingmenn þjóðarinnar. Hann hefur þó ekki lagt fram sannanir þess efnis.
Búið er að handtaka 40 manns vegna rannsóknar yfirvalda á árásunum. Mbl.is greinir auk þess frá því að á meðal vígamanna séu tveir bræður sem eru synir auðjöfurs í Colombo, höfuðborg Sri Lanka. Frömdu bræðurnir árásirnar á Shangri-La og Cinnamon Grand hótelunum þar í borg. Þegar sérsveitarmenn komu á heimili fjölskyldu annars þeirra sprengdi eiginkona hans sig upp ásamt börnum þeirra. Telur lögreglan í Colombo að fjölskyldan hafi verið sérstök hryðjuverkasveit.
Ríkisstjórn Sri Lanka hefur viðurkennt að hafa fengið ábendingu um fyrirhugaða árás innlendu hryðjuverkasamtakanna National Thowheeth Jama‘ath 10 dögum áður en árásarmennirnir framkvæmdu verknaðinn með samhæfðum sjálfsvígsárásum í kirkjum og á hótelum.
Lýsa yfir ábyrgð
Ríkisstjórn Sri Lanka kennir National Thowheeth Jama‘ath um verknaðinn og telur það mögulegt að þau hafi starfað með stórum alþjóðlegum hryðjuverkasamtökum á við Al-Qaeda eða Íslamska ríkinu.
National Thowheeth Jama‘ath hefur ekki lýst yfir ábyrgð á árásunum en það hefur Íslamska ríkið hins vegar gert. Íslamska ríkið hefur þó ekki fært fram neinar sannanir þar að lútandi. Í Fréttablaðinu er greint frá því að samtökin hafi oft lýst yfir ábyrgð á hryðjuverkaárásum undanfarin ár án þess að hægt hafi verið að sýna fram á aðkomu þeirra. Sérfræðingar sem breski miðillinn The Guardian vitnar í telja þó að árásirnar beri með sér fingraför Íslamska ríkisins.
Hryðjuverkasérfræðingar benda á að miðað við undirbúning árásanna og efniviðinn sem notaður hafi verið í sprengjugerðina sé ekki líklegt að National Thowheeth Jama‘ath hafi getað staðið ein að baki árásunum. Svo skammur var fyrirvarinn, auk þess sem samtökin eru sögð ung að aldri og fámenn.