Heiðar Guðjónsson, hagfræðingur og fjárfestir, hefur verið ráðinn forstjóri Sýnar. Hann hættir um leið sem stjórnarformaður félagsins og Hjörleifur Pálsson tekur við. Heiðar er einn stærsti hluthafi Sýnar, með 6,4 prósent hlut í gegnum Ursus ehf. Kjarninn greinir frá.
„Framundan eru krefjandi verkefni, sem ég hlakka til að leysa af hendi í samstarfi við allt það framúrskarandi fólk sem starfar hjá Sýn hf,“ segir Heiðar í tilkynningu til kauphallar.
Við þessar breytingar tekur Sigríður Vala Halldórsdóttir sæti í stjórn Sýnar.
Miklir erfiðleikar
Sýn hefur gengið í gegnum mikla erfiðleika undanfarin misseri, enda hefur markaðsvirði félagsins lækkað um 54 prósent á undanförnu ári.
Í febrúar á þessu ári hætti Stefán Sigurðsson sem forstjóri Sýnar og hefur Heiðar stjórnað daglegum rekstri í meiri mæli síðan. Þegar Stefán hætti lét hann meðal annars hafa eftir sér að hann vildi axla ábyrgð á því að afkomuáætlanir félagsins hafi ekki gengið eftir.
