Hagnaður allra stóru íslensku viðskiptabankanna, Arion banka, Íslandsbanka og Landsbankans, dróst saman á milli ára. Samanlagður hagnaður bankanna þriggja á árinu 2018 nam um það bil 37,7 milljörðum króna, sem er um 10 milljörðum minna en hagnaður þeirra árið 2017. Mbl.is greinir frá.
Í frétt Mbl.is kemur fram að hagnaður hafi dregist mest saman hjá Arion banka. Bankinn hagnaðist um 7,8 milljarða á árinu 2018, sem er tæplega helmingi minni hagnaður en árið 2017, þegar hann var 14,4 milljarðar. Arion banki tapaði tæplega þremur milljörðum króna á gjaldþroti Primera Air flugfélagsins.
Hagnaður Íslandsbanka á árinu 2018 nam 10,6 milljörðum króna, en bankinn hagnaðist um 13,2 milljarða árið 2017.
Landsbankinn skilaði ögn hagnaði en árið 2017 og afkoma bankans var sú besta af bönkunum þremur. Bankinn hagnaðist um 19,3 milljarða árið 2018, en hagnaður bankans árið 2017 var 19,8 milljarðar.
Stjórn Arion banka leggur til að hluthafar bankans fái 10 milljarða króna greidda í arð af eign sinni, stjórn Íslandsbanka ætlar að leggja til að bankinn greiði 5,3 milljarða í arð til hluthafa og bankaráð Landsbankans leggur til að bankinn greiði eigendum sínum 9,9 milljarða króna í arð.
Laun bankastjóra hækka
Í frétt Mbl.is kemur einnig fram að þrátt fyrir að hagnaður hafi dregist saman hækkuðu laun bankastjóra allra bankanna þriggja milli ára. Höskuldur Ólafsson bankastjóri Arion banka er með hæstu launin og hækkaði úr 62 milljónum á árinu 2017 í 67,5 milljónir á árinu 2018. Næst kemur Birna Einarsdóttir bankastjóri Íslandsbanka, en laun hennar hækkuðu úr 48,3 milljónum í 59,6 milljónir milli ára. Lægstu árslaunin er Lilja Björk Einarsdóttir bankastjóri Landsbankans með en hækkar þó mest milli ára, hennar laun fóru úr 27 milljónum á árinu 2017 í 44 milljónir á árinu 2018.
