Samgöngu- og sveitarstjórnarráðherra hefur skrifað undir nýja reglugerð um sektir og önnur viðurlög fyrir umferðarlagabrot sem tekur gildi 1. maí. Reglugerðin er sett með vísan til umferðarlaga nr. 50/1987.
Sektir fyrir umferðarlagabrot hafa margar hverjar verið óbreyttar í rúman áratug og mörgum þótt þær of lágar og hafa lítinn fælingarmátt. Sektir við umferðarlagabrotum eru til þess fallnar að veita ökumönnum aukið aðhald og stuðla þannig að auknu umferðaröryggi. Nauðsynlegt er að fjárhæð sekta endurspegli alvarleika umferðarlagabrota og þá hættu sem þau skapa. Flestar sektir hækka og margar þrefalt eða fjórfalt á við það sem þær eru núna.
Það sem hefur vakið sérstaka athygli er að sekt fyrir að nota farsíma við stýrið án handfrjáls búnaðar hækkar áttfalt og verður 40.000 krónur í stað 5.000 króna. Ástæða þeirrar hækkunar er meðal annars aukin tíðni slíkra brota og sú hætta sem er samfara notkun farsíma við akstur. Samkvæmt bandarískum rannsóknum er 25% allra bifreiðaslysa þar rakin til þess að ökumaður var að lesa eða skrifa skilaboð á snjallsíma á meðan á akstri stendur. Þar látast fleiri ungir ökumenn vegna ,,textaskilaboða“ en ölvunar. Það er engin ástæða til að ætla að það sé eitthvað betra hér á landi. Það verða og hafa orðið mjög alvarleg slys, banaslys, af völdum þess að ökumenn voru að nota farsíma á meðan á akstri stendur. Samkvæmt viðhorfskönnun sem Samgöngustofa gerði kemur fram að flestir vilja umtalsverða hækkun sekta vegna farsímanotkunar.
Lægsta sektarfjárhæð frá 1. maí verður 20.000 krónur en var áður 5.000 krónur (eina undantekningin er að sekt fyrir að hafa ekki ökuskírteini meðferðis verður 10.000 krónur). Hæstu sektirnar hækka líka, þó að hlutfallslega sé hækkunin ekki eins mikil.
Á vef Samgöngustofu verður hægt að fá allar upplýsingar um sektir fyrir umferðarlagabrot. Sektarreiknirinn verður uppfærður þar sem notendur geta valið sér skilyrði og fengið út hver refsingin kemur til með að verða fyrir hraðakstur og ölvunarakstur.
Hér má sjá nokkur dæmi um hækkun sekta fyrir umferðarlagabrot frá 1. maí 2018:
Brot | Var | Verður |
Ekið yfir löglegum hámarkshraða, hámarkshraði er 30 en ekið er á 67 | 40.000 | 90.000 |
Ekið yfir löglegum hámarkshraða, hámarkshraði er 50 en ekið er á 88 | 40.000 | 65.000 |
Ekið yfir löglegum hámarkshraða, hámarkshraði er 90 en ekið er á 160 | 150.000 | 240.000 |
Notkun farsíma án handfrjáls búnaðar við akstur | 5.000 | 40.000 |
Ekið gegn rauðu umferðarljósi | 15.000 | 30.000 |
Öryggisbelti ekki notað | 10.000 | 20.000 |
Biðskylda eigi virt | 15.000 | 30.000 |
Nagladekk án heimildar - fyrir hvern hjólbarða | 5.000 | 20.000 |
Ökuljós eigi tendruð í dagsbirtu | 5.000 | 20.000 |
Neysla áfengis eða annarra örvandi eða deyfandi efna við akstur | 20.000 | 60.000 |
Ölvun við akstur (hæstu sektir, vínandamagn í blóði 2,01 eða meira) | 240.000 | 320.000 |
Akstur bifreiðar til farþegaflutninga í atvinnuskyni án þess að hafa réttindi til þess | 15.000 | 60.000 |
Brot á sérreglum fyrir reiðhjól | 5.000 | 20.000 |
Brot á sérreglum fyrir létt bifhjól | 5.000 | 20.000 |
NÝTT: Hjólað gegn rauðu umferðarljósi | - | 20.000 |