„Náttúra Íslands er einstök á jörðinni eins og tungumálið sem íslensk þjóð talar. Náttúran og tungumálið haldast hönd í hönd og samtvinnuð gefa þau okkur Íslendingum þjóðareinkenni sem við þekkjum hvert í öðru. Landið og tungan hafa í ellefu hundruð ár veitt okkur af auðlegð minninga í orðum sem lýsa mannlífi kynslóð eftir kynslóð.“
Þannig hefst grein eftir Guðna Ágústsson fyrrverandi ráðherra og alþingismann sem er að finna í Morgunblaðinu í dag. Guðni hefur áhyggjur af þróun íslenskunnar, tungumálsins og gagnrýnir harðlega eigendur íslenskra fyrirtækja sem notast við erlend heiti hér á landi. Guðni segir:
„Alltaf er verið að hneykslast á börnum, að þau kunni málið verr en við sem eldri erum. En hvað gera svo þeir eldri sem halda utan um fjöreggið þegar þeir gefa fyrirtækinu nafn, ekki síst eftir að við urðum ferðamannaland? Atvinnulífið, ekki síst hótel og ferðamannaþjónustan, nefna fyrirtækin í stórum stíl upp á ensku og stundum veit maður ekki í hvaða borg maður er staddur hér í Reykjavík, ekkert nema útlensk nöfn á fyrirtækjum, sama á við á landsbyggðinni.“
Þá spyr Guðni: „Verðum við ekki að nefna fjöllin dalina og fossana upp á ensku? Ég held að þetta sé útlendingum ekki þóknanlegt, þeir undrast þetta að þjóð sem varðveitt hefur elsta tungumál Norðurlanda og skrifað sögu Norðurlanda og talar enn mál Snorra Sturlusonar skuli hegða sér með þessum hætti.“
Guðni heldur áfram: „Þessi þróun er til skammar og skaðar íslenskuna til langframa og gerir Ísland um margt aumkunarvert. Það eru fullorðnir karlar og konur sem ráða þessari för, ekki börnin, en þau læra það sem fyrir þeim er haft.“
Þá segir Guðni að lokum: „Ég skora á menntamálaráðherra að byrja að taka til í málgarði þeirra fullorðnu og þá þeirra sem stýra atvinnulífinu. [...] Öll fyrirtæki á Íslandi eiga að bera íslenskt nafn [...] Ég bið íslenskunni griða, þetta nafnarugl er það vitlausasta og mesta aðför að íslenskri tungu í ellefu hundruð ár.“