Eyþór Arnalds fjárfestir og borgarfulltrúi Sjálfstæðisflokksins þarf ekki að greiða Samherja þá fjármuni sem ársreikningar félags hans sýna að hann hafi skuldbundið sig til að greiða fyrir hlutabréfin í Morgunblaðinu frá árinu 2017. Þetta kemur fram í Stundinni.
Þar segir að Útgerðarfélagið Samherji hafi afskrifað meira en helming af kröfum sínum á hendur eignarhaldsfélagi Eyþórs. Stundin vitnar í ársreikninga félaga í eigu Samherja sem og í félag Eyþórs, Ramses II ehf.
Í Stundinni segir að viðskiptin líti út fyrir að vera sýndarviðskipti þar sem Samherji hafi viljað losna við hlutabréf í Morgunblaðinu og eignarhaldsfélag Eyþórs tók við hlutabréfunum án þess að hafa greitt fyrir þau eða þurfi þess í nánustu framtíð. Ingi Freyr Vilhjálmsson sem fjallar ítarlega um viðskiptin í Stundinni skrifar að gjörningurinn virki glórulítill út frá viðskiptalegu sjónarmiði, og þá sérstaklega í ljósi þess að uppsafnað tap Morgunblaðsins síðastliðinn áratug, frá uppkaupum nokkurra stærstu útgerðarfélaga landsins á því, nemur um 2 milljörðum króna.
Árið 2017 hélt Eyþór fram að um alvöru viðskipti væri að ræða en þá keypti hann hlutabréfin á 325 milljónir. Þá sagði Eyþór:
„Þetta eru alvöru, sjálfstæð viðskipti og verðið er trúnaðarmál. Samherji seldi þessi hlutabréf og ég er ekki skuldbundinn þeim með nokkrum hætti í kjölfarið. Ég er engum háður.“
Eyþór fékk lán fyrir þessum hlutabréfum frá félögum í eigu Samherja. Þá segir í Stundinni:
„Flest bendir hins vegar til þess að þessi viðskipti Eyþórs hafi heldur ekki falið í sér mikla áhættu fyrir hann þar sem hann greiddi líkast til ekkert fyrir hlutabréfin úr eigin vasa.“