Umhverfisstofnun hefur borist tilkynningar um að gestir nátturulaugarinnar í Landmannalaugum hefi fengið gífurleg útbrot vegna svokallaðs sundmannakláða. Í tilkynningu frá umhverfisstofnun segir að það séu sundlirfu fuglablóðagða sem hafa valdið útbrotunum sem gestir laugarinnar hafa fengið.
„Kláðabólur myndast þegar ofnæmiskerfi líkamans hefur tekist að stöðva lirfurnar. Sýni menn ekki ofnæmisviðbrögð hefur lirfunni tekist að komast óáreittri inn í líkamann, en þar drepst hún fljótlega. Blóðögðurnar finnast í andfuglum eins og stokkönd og duggönd sem eiga til að dvelja á svæðinu í Landmannalaugum,“ segir umhverfisstofnun.
Að sögn umhverfisstofnunar hefur stofnunin hafið samráð við sóttvarnarlækni vegna málsins. Er nú verið að vinna í því að koma í veg fyrir að fleiri gestir laugarinnar smitist af sundmannakláða, en vara samt fólk við því að það geti enn smitast heimsæki fólk laugina.
„Ekki hefur tekist að koma í veg fyrir það á þessu ári og þurfa því baðgestir að hafa það í huga að enn er möguleiki á að smitast af sundmannakláða.“
Þeir sem sýna ónæmisviðbrögð sitja uppi með slæman kláða og það eitt og sér er oftast mjög óþægilegt. Hitt er þó talið alvarlegra þegar engin útbrot myndast, því þá hafa lirfurnar komist inn í líkamann þar sem þær drepast samt fljótlega án þess að ná fullum þroska.