„Ég mun beina þeim tilmælum til nýkjörinnar stjórnar að haga sínum fjárfestingum með þeim hætti að það verði ekki fjárfest í fyrirtækjum sem eru með kaupréttarsamninga eða ofurlaun eða bónusa. Eða haga sér með þeim hætti eins og til dæmis Almenna leigufélagið, að beina viðskiptum sínum frá slíkum félögum. Það verða skýr skilaboð sem við munum senda nýrri stjórn Lífeyrissjóðs verzlunarmanna,“ segir Ragnar Þór Ingólfsson, formaður VR, en á næstu vikum verður ný stjórn kosin í Lífeyrissjóði verzlunarmanna. Kjarninn greinir frá.
Ragnar Þór er gestur Þórðar Snæs Júlíussonar, ritstjóra Kjarnans, í frétta- og umræðuþættinum 21 á Hringbraut í kvöld. Þar ræðir hann meðal annars þá stöðu sem er komin upp í kjaraviðræðum, fer yfir vonbrigði sín með tillögur ríkisstjórnarinnar í skattamálum og mjög opinberar deilur sínar við Almenna leigufélagið.
Lífeyrissjóður verzlunarmanna er næst stærsti lífeyrissjóður landsins og einn stærsti fjárfestir á íslenskum markaði. Yfirstandandi kjörtímabili stjórnarinnar lýkur í lok mánaðarins. Stjórn VR tilnefnir helming stjórnarmanna en samtök ýmissa atvinnurekenda hinn helminginn. Á næsta kjörtímabili verður stjórnarformaðurinn úr röðum þeirra sem VR tilnefnir.
Ragnar segir að skilaboð sín út á við vegna þessa séu þau að það verði breyttar og aðrar áherslur heldur en hafa verið. „Það eru skilaboð sem mig langar að senda út inn í fjármálakerfið, að menn skulu þá hugsa sig tvisvar um þegar þeir fara gegn hagsmunum launafólks með þessum hætti, að við munum beita okkur með róttækari hætti heldur en áður hefur verið.“
Brot úr þættinum er að finna hér:
Stjórn VR gaf í byrjun vikunnar Kviku banka, sem hyggst kaupa GAMMA, móðurfélag Almenna leigufélagsins, nokkra daga frest til að hætta við kaup sín á GAMMA vegna leiguhækkana Almenna leigufélagsins, ella myndi VR færa 4,2 milljarða króna sem eru í stýringu hjá bankanum annað.
Ragnar segir að hann og aðrir fulltrúar VR muni funda með Kviku á morgun vegna málsins „Ég veit svo sem ekki hvað kemur út úr því. Við munum standa fast á þessari ákvörðun. Þó að það liggi fyrir að stjórnendur Kviku hafi ekki bein áhrif á ákvarðanir Almenna leigufélagsins þá getum við allavega nýtt okkur það afl sem við höfum, að geta stýrt okkar sjóðstýringu hvert sem við viljum án þess að það kosti okkur eitthvað. Það kostar okkur ekkert að færa til okkar sjóði, við erum með þannig form á þeim. Við munum færa til okkar sjóði verði Almenna leigufélagið ekki við kröfum okkar um að hætta þessu ofbeldi sem er beitt gagnvart þeirra viðskiptavinum og leigjendum, okkar félagsmönnum meðal annars.“
Nánar er rætt við Ragnar Þór í 21 í kvöld. Þátturinn hefst klukkan 21:00.