Vilhjálmur Vilhjálmsson, lögmaður tveggja karlmanna sem sakaðir voru um nauðgun í Hlíðamálinu svokallaða, segir í samtali við mbl.is að dómsmál vegna þess séu fimm talsins.
Á meðal þeirra sem hefur verið stefnt er Hildur Lillendahl Viggósdóttur, fyrir færslu sem hún birti á Facebook. Krefjast mennirnir að hún verði dæmd til að greiða þeim hvorum um sig 1,5 milljónir króna.
Þá hafa þeir stefnt annarri konu sem skipulagði mótmæli við lögreglustöðina við Hverfisgötu eftir að fréttaflutningur af málinu birtist í fjölmiðlum. Konan er krafin um fjórar milljónir króna.
Stefnurnar voru lagðar fram í Héraðsdómi Reykjavíkur í október og til stóð að taka þær fyrir á föstudag en fyrirtökunni hefur verið frestað til 7. janúar, samkvæmt upplýsingum frá Vilhjálmi.
Í stefnunni gegn Hildi er krafist að ummæli sem hún skrifaði á Facebook verði dæmd dauð og ómerk. Í stefnunni er vísað í færsluna þar sem Hildur skrifar meðal annars að mennirnir hafi í sameiningu nauðgað konum „svo yfirdrifið kerfisbundið að þeir hafa til þess sérútbúna íbúð.“ Hildur sagðist ekki vilja tjá sig um stefnuna þegar mbl.is leitaði eftir viðbrögðum hennar.
Auk stefnanna tveggja sem birtar voru í október hefur verið dæmt í einu máli í Hæstarétti. Þá hefur annarri konu verið stefnt vegna ummæla í færslum sem konan birti á Twitter og Facebook. Mennirnir fara fram á að konunni verði gert að greiða þeim 2 milljónir króna, hvorum um sig. Sigmundi Erni Rúnarssyni, ritstjóra Hringbrautar, hefur einnig verið stefnt fyrir skrif Hringbrautar um málið.
Í október í fyrra voru fjórir fréttamenn 365 miðla dæmdir til að greiða mönnunum miskabætur vegna frétta um meint brot mannanna. Málið varðar umfjöllun fréttamiðla 365 af ætluðum kynferðisbrotum mannanna tveggja gegn tveimur konum sem áttu að hafa verið framin í október 2015. Mál mannanna voru rannsökuð en þau síðan felld niður.
Nánar á
https://www.mbl.is/frettir/innlent/2018/12/10/krefja_thrjar_konur_um_baetur/