Logi Einarsson, formaður Samfylkingarinnar, sagði í ræðu sinni á flokkstjórnarfundi í Austurbæ í morgun að flokkurinn verði að bjóða upp á skýra og trúverðuga stefnu sem mæti áskorunum samtímans. Þá sé hann viss um að flokkurinn fái umboð til að leiða saman umbótaöfl í ríkisstjórn eftir næstu kosningar.
Nánar er fjallað um ræðuna á vef Fréttablaðsins.
Í ræðunni ræddi Logi stöðuna í íslenskum stjórnmálum og sagði ljóst að Sjálfstæðisflokkurinn væri ekki lengur fær um að veita forystu. „Fálkanum er að fatast flugið og hann er ósköp ráðvilltur,“ sagði formaðurinn.
„Í sögulegu samhengi eru stóru tíðindin í íslenskum stjórnmálum þessi: Flokkurinn sem var vanur að tróna yfir öllum hinum, á 20. öldinni - gerir það ekki lengur. Flokkurinn, sem var myndaður úr frjálslyndum armi og íhaldssömum armi, er ekki lengur fær um að veita forystu og takast á við þær breytingar sem blasa við okkur á 21. öldinni; hann er klofinn - þvers og kruss,“ sagði Logi og bætti við á öðrum stað:
„Við verðum, og segjum það bara skýrt, við verðum að fella þessa ríkisstjórn í kosningunum 2021, til að mynda betri, djarfari og víðsýnni stjórn fyrir fólkið í landinu og komandi kynslóðir, við verðum að rísa undir þeirri ábyrgð.“
