Dagur B. Eggertsson, borgarstjóri Reykjavíkur, segir í nýrri færslu á fésbók sinni að honum hafi komið á óvart að Eyþór Arnalds, leiðtogi sjálfstæðismanna í Reykjavík, hafi mætt til fundar sem Dagur boðaði til í Höfða í fyrradag með borgarfulltrúum og þingmönnum Reykjavíkur.
Fundurinn hefði verið boðaður í tilefni af kjördæmaviku samkvæmt hefð í samráði við Guðlaug Þór Þórðarson utanríkisráðherra, fyrsta þingmann kjördæmsins og Katrínu Jakobsdóttur forsætisráðherra.
„Ég heilsaði honum í andyri hússins og sagði honum hvernig í málinu lagi,\" skrifar dagur áfram á fésbok sína og minnir þar á að fundurinn hafi verið ætlaður fyrir borgarstjórn og þingmenn en frambjóðendur hefðu ekki verið boðaðir: \"Ekkert fór á milli mála í þessum samskiptum. Þess var beðið í nokkrar mínútur að allir fundarmenn skiluðu sér og þegar forsætisráðherra var komin í hús bauð ég fundargestum að setjast við langborð,“ segir Dagur enn fremur.
„Þá brá svo við Eyþór gengur í salinn,\" skrifar Dagur \"og býst til að setjast í auða sætið við hlið Guðlaugs, sem ætlað hafði verið fyrir forsætisráðherra. Við það gerði ég athugasemd, ítrekaði hvers eðlis fundurinn væri, hverjum hefði verið til hans boðið og að ég væri viss um að Vigdís Hauksdóttir hefði líka verið til í að sitja fundinn en hann hefði ekki verið ætlaður frambjóðendum,“ en Vigdís mun sem kunnugt er leiða lista Miðflokksins í Reykjavík.
Dagur segir að ef áhugi væri á slíkum fundi með frambjóðendum þyrfti að boða til hans sérstaklega: \"Eyþór vék við svo búið af fundinum, forsætisráðherra tók sæti sitt en utanríkisráðherra upplýsti að hann hefði boðið Eyþóri. Voru ekki höfð uppi mikið fleiri orð um þetta atvik þótt sérstakt hafi verið.“ Dagur bætir loks við að óvenju létt hafi verið yfir fundinum og umræður málefnalegar.