Eyrún Magnúsdóttir hefur verið ráðin framkvæmdastjóri Kjarnans og hefur þegar hafið störf. Hún hefur síðastliðin tæp sjö ár haft umsjón með og ritstýrt Sunnudagsblaði Morgunblaðsins. Þetta kemur fram í tilkynningu frá Kjarnanum.
Eyrún tekur við starfi framkvæmdastjóra af Þórði Snæ Júlíussyni sem gegnt hefur stöðunni samhliða ritstjórastarfi frá byrjun árs 2018, eftir að Hjalti Harðarson, einn eigenda miðilsins, lét af störfum. Þórður Snær mun nú einbeita sér alfarið að ritstjórn Kjarnans.
Auk þess að hafa starfað á Morgunblaðinu í tæp sjö ár starfaði hún áður sem ráðgjafi til margra ára. Þar kom hún að ýmis konar verkefnastjórnun, markaðs- og útgáfumálum og stefnumótunarvinnu. Hún starfaði auk þess á RÚV á árunum 2004 til 2006 og var meðal annars einn þáttastjórnenda Kastljóss á því tímabili. Eyrún er með BA gráðu í í hagfræði með sagnfræði sem aukagrein og hefur einnig lokið meistaranámi í stjórnun og stefnumótun frá viðskiptafræðideild Háskóla Íslands.
Eyrún kveðst spennt fyrir nýja starfinu: „Kjarninn hefur náð að skapa sér sess sem vandaður miðill þar sem áherslan er á gæði og dýpt umfjöllunar. Blaðamenn og aðrir sem að Kjarnanum standa hafa skýra sýn á hlutverk sitt við að upplýsa og útskýra með almannahag að leiðarljósi. Ég er ákaflega spennt að takast á við áskoranir framtíðarinnar með þessum metnaðarfulla hópi og taka þátt í að þróa Kjarnann áfram.“
Þórður Snær er sömuleiðis lukkulegur og segir það mikinn feng að fá Eyrúnu til starfa: „Rekstur Kjarnans hefur gengið vel undanfarin ár og er í góðu jafnvægi. Stefna okkar sem að honum standa er að halda áfram að vaxa, styrkja stöðu Kjarnans í íslensku fjölmiðlaumhverfi og auka við þá umfangsmiklu fréttaþjónustu sem við veitum lesendum okkar nú þegar. Eyrún hefur mikla reynslu af fjölmiðlastarfsemi auk þess sem hún býr yfir menntun, þekkingu og hæfileikum til að leiða þann vöxt.“
