„Það sem gerir stöðuna svo vonda er að áhrifin á vistkerfið allt eru kannski meiri og djúpstæðari en menn vilja viðurkenna. Svo er líka það að við erum ekkert að gera og við höfum ekkert verið að gera. Við erum búin að vera að tala um þetta í 25 ár en við erum ekkert að gera. Þær þjóðir sem láta sem hæst eru strangt til tekið kannski ekkert að gera í málunum,“ segir Guðni Elísson prófessor og stofnandi alþjóðlegrar upplýsingaveitu um loftslagsmál.
Guðni var gestur Margrétar Marteinsdóttur í 21 í gærkvöld og ræddi loftslagsmál.
Guðni hefur sjálfur verið í sambandi við loftslagsvísindamenn vegna vandans. „Það eru til loftslagsvísindamenn sem vilja skýra frá vandanum tæpitungulaust,“ segir hann. Þrátt fyrir það segir hann stöðuna vera verri en margir loftslagsvísindamenn greini frá.
Guðni segir ýmsar ástæður fyrir því að loftslagsvísindamenn dragi úr alvarleika stöðunnar, t.d. að þeir séu alltaf ásakaðir um að mála skrattann á vegginn, sem leiði þá til þess að þeir passi sig um of og greini ekki alveg frá myndinni eins og hún er.
Önnur skýring sé að vísindin eru varfærin, vísindamenn séu hræddir við að fullyrða um eitthvað þar til það liggi fyrir nokkuð skýr vissa um hlutina.
Þriðja skýringin sé að það sem er alltaf byggt inn í loftslagsumræðuna, loftslagsfyrirlestra og loftslagskvikmyndir er spurning um hvernig við ætlum að bregðast við, hvernig ætlum við að leysa þennan vanda? Dregin sé upp dökk mynd af stöðunni en svo sé boðið upp á lausnir en vandinn er oft sá að lausnirnar sem boðið er upp á eru ekki alltaf í samræmi við það sem við getum gert, stöðuna eins og hún er eða vilja almennings og stjórnvalda til að bregðast við.
Viðtalið við Guðna í heild sinni er að finna hér að neðan: