Elías Hergeirsson, fyrrverandi aðalbókari í Héðni, lést á hjúkrunarheimilinu Sóltúni 7. október, 81 árs að aldri. Elías var knattspyrnumaður á sínum yngri árum og gegndi trúnaðarstörfum fyrir Val og Knattspyrnusamband Íslands. Var hann formaður Vals og einnig gjaldkeri KSÍ. Þá varð hann Íslandsmeistari með Val. Greint er frá andláti Elísar í Morgunblaðinu.
Elías hóf að sparka bolta með KR-ingum á Framnesvellinum en gekk í Val og æfði og keppti í knattspyrnu með félaginu í öllum aldursflokkum. Hann varð nokkrum sinnum Íslandsmeistari og Reykjavíkurmeistari í yngri flokkum og lék 100 keppnisleiki með meistaraflokki á árunum 1956 til 1962, varð Íslandsmeistari 1956.
Elías sat í stjórn knattspyrnudeildar Vals og var formaður í fjögur ár, sat í aðalstjórn Vals, í stjórn Knattspyrnuráðs Reykjavíkur og í stjórn Knattspyrnusambands Íslands í tólf ár, þar af gjaldkeri í níu ár. Hann æfði og keppti á skíðum með Ármanni á unglingsárum. Elías var sæmdur heiðurskrossi ÍSÍ.
Eftirlifandi eiginkona Elíasar er Valgerður Anna Jónasdóttir skrifstofumaður. Þau eignuðust fjögur börn, Hergeir, Margréti, Ragnheiði og Jónas.
Halldór Einarsson, oft kenndur við Henson, minnist Elísar í Morgunblaðinu í dag.
„Valur er ekkert annað en ég, þú og allir hinir,“ var sagt fyrir margt löngu og vissulega vegnar hverju íþróttafélagi misvel og þar eru margir áhrifavaldar þar sem hver einstaklingur leikur misstórt hlutverk.
Knattspyrnufélagið Valur sér nú á bak einum af sínum allra bestu sonum þegar Elías Hergeirsson er kvaddur. Vinnusemin, heilindin og hið jákvæða lundarfar voru meðal einkenna þessa góða drengs.
Elías spurði aldrei hvað Valur gæti gert fyrir hann, það var alltaf á hinn veginn, og það var ekki tilviljun að við félagar í fulltrúaráðinu ákváðum að Elías yrði fyrstur til að veita viðtöku Friðrikshattinum þegar sú venja var tekin upp í tengslum við jólafund ráðsins.
Elías, sem kom úr Vesturbænum, varð Íslandsmeistari með Val 1956 og eftir að farsælum keppnisferli lauk tóku félagsstörfin við, þ.á m. formennska í knattspyrnudeildinni og seta í aðalstjórn félagsins. Starfsvettvangur Elíasar var lengst af Vélsmiðjan Héðinn og var gaman að koma þangað forðum daga þegar þeir voru þar þrír saman, Elías, Friðjón B. Friðjónsson og Róbert Jónsson, allir gegnheilir Valsarar sem unnu sínu félagi heitt.
Auk starfanna fyrir Val sat Elías í stjórn KRR og var í mörg ár gjaldkeri KSÍ. Allt þetta hefði ekki getað gengið nema fyrir stuðning eiginkonu hans og barna, en Valgerður og Elías voru sannarlega glæsileg saman.
Innilegar samúðarkveðjur og þakkir eru hér sendar til fjölskyldunnar og fjölda vina. F.h. fulltrúaráðs Vals, Halldór Einarsson.“
Útför Elíasar fer fram frá Hallgrímskirkju í dag.