Landsréttur hefur fundið Hreiðar Már Sigurðsson, fyrrverandi forstjóra Kaupþings, og Magnús Guðmundsson, fyrrverandi forstjóra Kaupþings í Lúxemborg, seka um fjárdrátt og hlutdeild í fjárdrætti vegna Marple málsins svokallaða. Hvorugur hlýtur þó refsingu vegna brotanna þar sem þeir hafa þegar náð sex ára refsihámarki auðgunarbrota vegna fyrri dóma tengdum hruninu. Vísir og Kjarninn eru meðal þeirra sem greina frá.
Hreiðar Már var sakfelldur fyrir fjárdrátt og Magnús var sakfelldur fyrir hlutdeild í fjárdrætti. Ákært var í þremur liðum en sýknað í tveimur þeirra. Sakfellt var í lið sem sneri að millifærslu á þremur milljörðum króna frá Kaupþingi hf. til Kaupþings LÚX en þaðan var sú upphæð millifærð á reikning félagsins Marple.
Landsréttur telur í dómi sínum að þótt brot Hreiðars varði háa fjárhæð sé málið fjarri því eins yfirgripsmikið og þau brot sem hann hafi þegar verið fundinn sekur um og sætt refsingu fyrir. Landsréttur vísar í sömu rök varðandi niðurfellingu á refsingu Magnúsar, en hann var fundinn sekur um hlutdeild í brotum Hreiðars Más.
Í frétt Kjarnans um málið kemur fram að Magnús hafði áður hlotið fjögurra ára og sex mánaða dóm og bættist 18 mánaða dómur héraðsdóms þar ofan á. Með fyrri dómum hafði Hreiðar hlotið sex ára fangelsi fyrir fjármálabrot, en það er refsihámark slíkra brota. Til viðbótar var honum dæmdur hegningarauki í dómi héraðsdóms í Marple málinu.
Skaðabótakrafa Kaupþings á hendur Hreiðari Má og Magnúsi vegna brota þeirra var viðurkennd af Landsrétti. Þeir þurfa að greiða þriðjung málsvarnarlauna verjenda sinna í héraði og fyrir Landsrétti, en annar kostnaður fellur á ríkissjóð.
Fjárfestirinn Skúli Þorvaldsson, eigandi Marple, var sýknaður af kröfum ákæruvaldsins, en hann hafði áður hlotið sex mánaða dóm í héraði. Guðný Arna Sveinsdóttir, fyrrverandi fjármálastjóri Kaupþings, var sýknuð af ákærum sínum um fjárdrátt og umboðssvik og með því staðfesti Landsréttur sýknudóm hennar.
