Brynjar er þingmaður Ruslflokksins

Brynjar er þingmaður Ruslflokksins

Brynjar Níelsson hætti sér út á hála ísinn þar sem hann er þynnstur með því að ráðast gegn íslenskum fjölmiðlum með dæmalausum skætingi.

Hann kveinkaði sér undan gagnrýni á getuleysi stjórnmálamanna en stétt þeirra hrakar ár frá ári að flestra mati.

Brynjar getur ekki svarað gagnrýni á sig og Sjálfstæðisflokkinn með neinum rökum en velur að kasta skít í alla fjölmiðla landsins og segir þá “veikasta hlekkinn” í íslensku samfélagi - “eiginlega í ruslflokki.”

Ætla má að þeir fjölmiðlar sem hafa þjónað Sjálfstæðisflokknum gagnrýnislaust í blindri meðvirkni kunni illa að meta þennan skæting Brynjars. Þá er að sjálfsögðu átt við Morgunblaðið, Útvarp Sögu og Viðskiptablaðið.

Með tali um “ruslflokk” opnaði þingmaðurinn á hreinskilna umræðu um Sjálfstæðisflokkinn sem margir líta nú orðið á sem “ruslflokk.” Fólk hefur samt veigrað sér við að tala þannig. En nú hefur Brynjar sett nýtt viðmið og kallað sannleikann yfir flokkinn.

Menn skyldu líta yfir 16 manna þingflokk Sjálfstæðisflokksins og reyna að telja á fingrum annarrar handar þá sem gætu talist hæfir og dugandi stjórnmálamenn. Það er torsótt og mikið basl.

Það eru innan við 20 ár frá því Sjálfstæðisflokkurinn státaði af fjölmörgum skörungum á þingi. Þá er átt við fólk eins og Davíð, Þorstein, Friðrik, Geir Haarde, Þorgerði, Einar Odd, Árna Matth, Einar Kristinn, Ólaf G. Einarsson, Sólveigu, Halldór Blöndal og Vilhjálm Egilsson svo einhverjir séu nefndir.

Núverandi þingflokkur þolir engan samanburð við þessa skörunga. Enda naut flokkurinn þá stuðnings 35-40% þjóðarinnar en nú er fylgið fast í 25%.

Brynjar gerði rétt í að hafa sig hægan til að beina ekki meiri athygli að sér og sínum “ruslflokki.”

Rtá.

Nýjast