Það ráku margir upp stór augu á sunnudaginn þegar kvensjúkdómalæknirinn Arnar Hauksson birtist skyndilega á sjónvarpsskjá landsmanna í þáttunum Pabbahelgar.
Margir áttuðu sig strax á því að um Arnar var að ræða enda er hann einn virtasti kvensjúkdómalæknir landsins og lék hann sjálfan sig í þættinum. Rætt var við Arnar í Síðdegisútvarpinu um aðkomu hans að þáttunum, leiklistarferilinn og fleira.
„Þetta var nákvæmlega eins og það er. Þetta var bara þægilegt og notalegt og Nanna er núna búin að fá alveg fullkomna skoðun,“ sagði Arnar í samtali við Síðdegisútvarpið.
Í þáttunum mætti persóna Nönnu í hefðbundna skoðun til kvennsjúkdómalæknis og tókst senan vel til.
Arnar hafði ekki sagt neinum frá þátttöku sinni í þáttunum og brá því mörgum í brún þegar hann birtist skyndilega í sjónvarpinu. Dóttir Arnars var meðal þeirra en hún hafði ekki hugmynd um hlutverk föður síns.
Arnar hefur fengið mikið hrós fyrir leik sinn og segir hann að hlutverk sitt hafi ekki verið mikið mál, enda hafi hann í raun ekki verið að leika.
„Ég var bara að vinna vinnuna mína,“ sagði Arnar sem er ansi vanur því að nota leggogginn í starfi sínu.
Þegar þáttastjórnendur Síðdegisúrvarpsins greindu Arnari frá því að hann hefði rokið upp frægðarlistann á IMDB (Internet movie database) vissi hann ekkert um málið.
„Ég er samt ekki búinn að fá Óskarstilnefninguna ennþá,“ sagði hann við fréttunum.
