Aníta Estíva Harðardóttir hefur verið ráðin sem blaðamaður á Hringbraut.is. Undanfarin tvö ár hefur Aníta Estíva starfað sem blaðamaður hjá DV bæði á vef og blaði.
Aníta Estíva var ráðin sem blaðamaður á DV árið 2017 og eftir þrjá mánuði í starfi var henni falið að taka við umsjón vefsins Bleikt.is sem þá var sér vefsíða í eigu Frjálsrar Fjölmiðlunar. Á þeim tíma tvöfaldaðist lestur Bleikt og sinnti Aníta Estíva umsjón vefsins í rúma níu mánuði eða allt þar til hann sameinaðist dægurmáladeild á vefsíðu DV.
Þá starfaði Aníta Estíva sem blaðamaður á helgarblaði DV þar til hún lét af störfum um miðjan september mánuð á þessu ári og gekk til liðs við Hringbraut.
„Það er mér mikill heiður að koma til starfa á Hringbraut. Hér er virkilega gott fjölmiðlafólk með mikla reynslu í faginu. Allir hafa brennandi áhuga á vinnunni sinni og starfsandinn í takt við það. Ég er fullviss um það að framtíðin sé björt og spennandi hér á Hringbraut og ég hlakka mikið til þess að takast á við komandi verkefni,“ segir Aníta Estíva.
Útgefandi og framkvæmdastjóri Hringbrautar er Guðmundur Örn Jóhannsson. Sjónvarpsstjóri er Sigmundur Ernir Rúnarsson og ritstjóri Kristjón Kormákur Guðjónsson.
