Andri Már Ingólfsson, fyrrverandi eigandi flugfélagsins Primera Air, sem var úrskurðað gjaldþrota í október á síðasta ári, greiddi þrotabúi félagsins 200 milljónir króna í reiðufé. Upphæðina greiddi hann gegn því að fallið yrði frá málsóknum á hendur honum og samþykkti hann einnig að falla frá þeim kröfum hann hafði lýst í þrotabúið. Frá þessu er greint í Markaðnum í dag.
Kröfur Andra Más og félaga á hans vegum, þar á meðal félags í eigu dönsku ferðaskrifstofunnar Bravo Tours, námu samanlagt ríflega tveimur milljörðum króna. Andri Már var næst stærsti kröfuhafi þrotabúsins á eftir Arion banka.
Í síðasta mánuði greindi Viðskiptablaðið frá því að samkomulag milli Andra Más og þrotabúsins hafi náðst. Í samtali við blaðið sagði Andri Már að málinu væri lokið frá sínum bæjardyrum séð og að hann hefði persónulega tapað gríðarlegum fjárhæðum á gjaldþroti Primera Air.
„Það er auðvitað mikil eftirsjá að svona skyldi fara fyrir félagi sem hafði verið í góðum rekstri í fjórtán ár,“ sagði hann.