Velferðarráð Reykjavíkurborgar kallaði til fundar á öðrum tímanum í dag með með hagsmunaaðilum um málefni heimilislausra í borginni. Mbl.is greinir frá. Fundurinn er sagður fyrsta skref að nýrri stefnu Reykjavíkurborgar í málaflokknum.
Tillögur um úrbætur í málaflokknum eru neyðarskýli fyrir yngri utangarðsmenn, fjölgun smáhýsa og kaup á gistiheimili sem hægt er að breyta í 25 íbúðir fyrir heimilislausa. Einnig er lögð áhersla á fyrirbyggjandi úrræði svo utangarðsfólki fjölgi ekki mikið meira. Heiða Björg Hilmisdóttir, formaður velferðarráðs segir í samtali við Mbl mikilvægt að tengja saman úrræði sveitarfélaga, ríkisins og áfangaheimila til þess að fólk festist síður á mismunandi stöðum. „Það eru allir af vilja gerðir, margir að reka ýmiss konar úrræði en þeir upplifa að keðjan, fólk flytjist á milli eftir bata eða ástandi hverju sinni, að hún þurfi að ganga betur\", segir hún.
