Stjórn fjölmiðlafyrirtæksins N4 á Akureyri ætlar að freista þess að auka hlutafé þess um 50 milljónir króna, en reksturinn stóð ekki undir sér seinni helming síðasta árs og varð fyrirtækið fyrir vikið að grípa til uppsagna og skipulagsbreytinga.
Jón Steindór Árnason, stjórnarformaður N4 segir í samtali við Fréttablaðið í dag ap töluvert vanti upp á svo reksturinn standi undir sér. Fyrirtækið hafi velt 200 milljónum króna á síðasta ári og 50 milljóna króna viðbótarþörf segi sína sögu um stöðu þess, en endurspegli þó öðru fremur það rekstrarumhverfi sem einkareknir miðlar hafi búið við á síðustu árum.
María Björk Ingvadóttir, framkvæmdastjóri N4 segir samkeppnisstöðu N4 vera skakka þar sem semja þurfi við Vodafone og Símann um dreifingu, en þar séu komnir aðalkeppinautar N4. Einnig sé ríkið stór leikandi á markaðnum. \"Tvggja daga rekstrarfé RÚV myndi duga okkur á árs basis til að halda okkur gangandi,\" segir María og hvetur stjórnvöld hér á landi til að horfa til aðgerða Norðmanna sem styðji fjölmiðarekstur úti á landi með metnaðarfullum hætti.
